WORTELS BLY GOED VOORSIEN

Goeie produksietoestande en ’n bestendige worteloes wat deurlopend plaaslik beskikbaar is, hou die produsenteprys onder druk, sê mnr. Gert Janse van Rensburg, groenteboer van Brits in Noordwes.

Mnr.RudiEngelke,groenteboer van die Kaapse Vlakte, meen die droogte het ’n uitwerking op die wortelboere in die Kaapse Skiereiland. “Ons het nie genoeg water gehad om die wortels behoorlik deur die hitte van Desember en Januarie te kry nie. Die gehalte is derhawe geknou. Die meeste boere van hier gaan nie veel water vir produksie beskikbaar hê teen einde Maart nie.”

Mnr. Rossouw Cillié, groenteboer van Ceres en die Sandveld, sê die tekort aan water in die Kaap behoort nie te veel van ’n invloed op die beskikbare volume en die produsenteprys van geelwortels te hê nie. “Die produksietoestande en waterbeskikbaarheid in die meeste produksiegebiede elders in die land was en is steeds goed. Ek voorspel daarom die prys sal in die voorsienbare toekoms sywaarts beweeg.”

Gert beaam dit en meen die geelwortels wat tans in die noorde geoes word, is van goeie gehalte. “Voorheen was Februarie tot April ’n tyd wanneer wortels duur geraak het, maar die groter boere wat in meer as een streek wortels kweek en dus volgehoue lewering kan verseker, het nou wortels om te bemark in die tye toe daar tradisioneel tekorte was. Die kans is daarom skraal dat die prys drastiese skommelinge sal ondergaan.”

Rossouw sê dit blyk uit die gemiddelde en laer verkope dat die verbruiker nie veel besteebare kontant het nie. Volgens Rudi behaal mooi geelwortels nou tot R4/kg.