NÓG ’N MEEVALLER MET BRANDSTOF
Die bedanking van mnr. Jacob Zuma en die verkiesing van mnr. Cyril Ramaphosa tot nuwe President van Suid-Afrika behoort te lei tot ’n aansienlike meevaller vir motoriste.
Mnr. Dawie Maree, hoof van landbou-inligting en bemarking by FNB, sê op 16 Februarie was daar ’n oorverhaling van ongeveer 44c/liter vir diesel en 32-35c/liter op petrol. “Die verstewiging in die plaaslike wisselkoers ná die politieke ontwikkelinge het ’n groot rol gespeel in hierdie oorverhaling. Daarmee saam het die internasionale prys van Brent-ruolie verlaag, wat verdere goeie nuus vir plaaslike brandstofpryse is.”
Dit sal die derde opeenvolgende verlaging in brandstofpryse wees. In Januarie het petrolpryse met 29-34c/liter gedaal, terwyl die dieselprys terselfdertyd met 22-26c/ liter gedaal het. In Februarie was die daling 26c/liter vir petrol en vir diesel 30-32c/liter.
Maree sê ongelukkig is dit ’n maand met lae verbruik in die algemeen vir die landbou, maar steeds goeie nuus. “Andersyds is dit ook goeie nuus vir die verbruiker, veral wat betref inflasie en toekomstige rentekoersbewegings. As die wisselkoers op die huidige vlakke kan stabiliseer, kan dit oor die volgende paar maande goed wees vir inflasie-verwagtinge.
Die verwagting is egter dat die Minister van Finansies in die komende begroting weer die belasting op brandstof sal verhoog om die staatskas, wat onder groot druk verkeer, aan te vul.”
Hy sê dit beteken die verligting in brandstofkoste kan dus van korte duur wees, as dit wel die geval is. Hierdie brandstofbelasting sal in April in werking tree.