KUNDIGES SE KOMMENTAAR

PROF. NORMAN

MAIWASHE, hoof van die Landbounavorsingsraad se Instituut vir Diereproduksie by Irene, sê: Beskikbare grond vir beesboerdery neem af en die vraag na voedsel styg. Die oplossing is groter produksie per eenheid van die hulpbronne (meer kilogram beesvleis per hektaar) en ’n kleiner impak op die omgewing per kilogram beesvleis geproduseer (minder voer per kilogram beesvleis geproduseer).

Sommige beeste is goeie vleisproduserende, biologiese fabrieke, maar ander is nie. Die verskil tussen goeie en swak voerdoeltreffendheid is nie net fenotipies nie, maar ook geneties (die genetiese samestelling van die dier). Doeltreffende beeste kan aan die hand van hul netto voerinname (NVI) gemeet word, wat ook residuele voerinname (RVI) genoem word. Voerinname kan verminder word sonder om ’n bees se grootte en groei te benadeel. Dié eienskap is oorerflik. Seleksie kan dus gebruik word om die doeltreffendste beeste te bepaal.

Dit kan lei tot ’n daling van 9-10% in onderhoudskoste, 10-12% in voerinname en 5-20% in misproduksie sonder om die gemiddelde daaglikse gewigstoename (GDT) of volwasse koeigewig te benadeel.

Me. Alison Sundstrum, uitvoerende hoof van GrowSafe in Kanada, sê:

Die landbou sal teen 2050 na raming 10 miljard mense moet voed sonder dat daar meer grond beskikbaar gaan wees. Boere sal dit met minder arbeid, doeltreffender en volhoubare produksiemetodes en met inagneming van klimaatsverandering moet regkry.

Indien hulle die GDT met 10% verbeter, sal dit die wins met 18% verhoog. ’n Verbetering van 10% in voerdoeltreffendheid sal die wins egter met 43% laat styg.

Op ’n basis van hoeveelheid voer per kilogram gewigstoename is beeste baie minder doeltreffend as sommige ander lewende hawe. Pluimvee se voerdoeltreffendheid het met 250% verbeter sedert dié bedryf die beginsel van RVI begin navors het. Daarteenoor het die beesbedryf in die afgelope dertig jaar feitlik niks gevorder nie.

RVI is die verskil tussen ’n dier se gemete voerinname en sy verwagte voervereistes vir onderhoud en groei. Dit is matig oorerflik (35-40%). Seleksie sal lei tot nageslag wat minder voer gebruik om hul produksievlak te handhaaf.

Eagle Pass-plase in Suid-Dakota, Amerika, het GrowSafe in 2007 begin gebruik. Vandag is hul bulle 15% meer voerdoeltreffend en hulle handhaaf ’n verhouding van 4,3:1. In 2013 is elke koei wat in die boonste helfte van haar kontemporêre groep as ’n jaaroudvers geëindig het, in die teelkudde opgeneem. Die res is as ontvangerkoeie gebruik.

Sewe jaar nadat seleksie vir voerdoeltreffendheid begin het, gebruik die boerdery 2 ton minder voer per dag en bespaar hy R1,4 miljoen per jaar aan voer.