KOMMENTAAR OP STAATSREDE
Talle lesers het op ons Facebookblad kommentaar gelewer nadat die nuutverkose President, mnr. Cyril Ramaphosa, op 16 Februarie sy eerste staatsrede gelewer het. Hy het onder meer die belangrikheid van die landbousektor beklemtoon en gesê hy is ernstig daaroor om grondhervorming te laat werk, insluitend deur onteiening sonder vergoeding.
ELIZE JANSEN VAN RENS
BURG skryf: Die President is ’n sakeman. Ek dink nie hy sal toelaat dat ’n produktiewe plaas wat ’n bydrae tot die land se ekonomie lewer, net gevat word nie. Daar sal na plase gekyk word wat onproduktief lê en nie bewerk word nie en wat van een geslag na die volgende oorgedra word.
MAGDA MYBURGH skryf: Mense loop steeds met oogklappe rond. Niks gaan beter word nie.
ETIENNE ADALBERT ERNST skryf: Vuisslaanreaksies is niks anders as ’n weerspieëling van sekere mense se diepgewortelde vrese nie. Daarteenoor is handuitreikreaksies dié van ’n klein groepie mense wat verstaan dat die gees van vreesagtigheid nie van God kom nie en dat ’n opregte geloof gevestig is op hoop en liefde vir ons medemens, insluitend hulle wat ons as ons vyande beskou. Ek ken Cyril Ramaphosa. Hy is ’n leier met integriteit wat weet wat die probleem is.
GERRIT DE KOCK skryf: Daar is tog ’n verskuiwing weg van die vingerwyspolitiek van die afgelope 20 jaar en meer hand-in-eie-boesem-steek-praatjies. Ek hoop van harte die belofte van optrede teen korrupsie word deurgevoer. Daar is verdienste in die toespraak. Ons hoef nie saam te stem met die metodiek om respek te hê vir die wyse waarop dit oorgedra is nie.
PETRO MCKENZIE skryf: Hy lyk goed en hy praat goed, maar ek is nie vol vertroue oor hom nie. Hy het inderdaad gesit en toekyk hoe die ANC opgemors het. Dit is beslis ’n ANC-probleem.
MARGOT SHAW HUYSAMER skryf: Wel, hulle moet nou besluit en die swaard oor boere se koppe laat val of verwyder.
ETIENNE ADALBERT ERNST
skryf: Ek vertrou almal wat hier skryf, is boere. Ek is ’n boer! Luister mooi na my profesie. Niémand wat produktief op sy grond boer en sodoende kos sit op die tafel van stedelinge wat by Food Lover’s Market en soortgelyke plekke koop, se plase gaan gevat word nie.
GLOUDINA MARIA CROUS
antwoord: Ek hoor wat jy sê, maar die Regering het self ’n klomp onproduktiewe plase. Ons sal sien of hy eerste daaraan iets gaan doen. Plaasmoorde is ook nie genoem nie. Ons roei nog in dieselfde Zuma-bootjie.
GERHARDUS DU RAAN skryf: Goeie op-die-man-af-toespraak. Grondhervorming kan werk, maar daar is nog te veel mense wat dink dis in hul belang as dit nié werk nie. Die teendeel is egter waar. Dis in almal se belang dat grondhervorming werk.