BOERBOKKE, BEESTE EN WEIDING
Watter mate van mededinging om weiding is daar tussen Boerbokke en beeste? Ons omgewing het baie struike en bome. Hoe kwesbaar is Boerbokke, veral lammers, vir jakkalse? Is dit nodig om hul snags op kraal te hou? Die Boerbok is ’n blaar(struik)-en-grasvreter, terwyl die bees hoofsaaklik ’n grasvreter is. Die Boerboek se dieet sal waarskynlik bestaan uit die helfte blare en die helfte gras. Dit is dus so dat daar mededinging tussen bokke en beeste kan ontstaan, maar algemeen gesproke vul die twee mekaar goed aan.
Mededinging sal net werklik ’n rol speel in droogtetoestande, dit wil sê wanneer voer skaars begin word. Die bok is, soos die skaap, in staat om veld baie korter te bewei as beeste. Wanneer daar ’n tekort aan weiveld is, kan beeste deur die mededinging benadeel word.
Boerbokke word baie gebruik om bosindringing teen te werk en kan dus voordelig saam met beeste gebruik word.
Die Boerbok is baie vrugbaar en meerlinge kom gereeld voor.
Waar roofdiere, soos rooikatte en jakkalse, voorkom, sal dit nodig wees om die lammers tot speentyd te beskerm deur die diere saans op kraal te hou.
Ondervinding het ook geleer dat lammers self helder oordag gevang kan word in baie beboste gebiede. Bykomende maatreëls sal dan getref moet word om die lammers te beskerm. Tydens lamtyd moet daar baie goeie toesig wees.