Dié week in die landbou
TIER TREK SWAAR
Die genoteerde voedselmaatskappy Tiger Brands se omset was weens die pap ekonomie en voortgesette droogte in die Wes-Kaap op ’n jaargrondslag 5% kleiner in die vier maande tot 31 Januarie. Tog het die sterker rand, saam met laer pryse vir grondstowwe, gesorg vir ’n hoër bruto wins. Die maatskappy sê in ’n kennisgewing op die JSE-nuusdiens enige betekenisvolle verbetering in sy resultate sal afhang daarvan of die verbruikersomgewing verbeter. Die hooffokus bly kostebesparing. Die maatskappy sê tensy perke op die gebruik van boorgatwater ingestel word, sal die droogte en watertekorte in die Wes-Kaap nie sy fabrieke daar ontwrig nie.
GEEN DEURBRAAK
Die dodetal in die grootste uitbreking van listeriose tot dusver in Suid-Afrika en ter wêreld het teen druktyd op 164 gestaan en steeds kan die bron van die besmetting nie opgespoor word nie. Die meeste gevalle (59%) het in Gauteng voorgekom, gevolg deur die WesKaap met 13% en KwaZulu-Natal met 7%. Volgens die Nasionale Instituut vir Oordraagbare Siektes (NIOS) kan daar nou al rekenskap gegee word van 597 van die 872 laboratoriumbevestigde gevalle van die siekte wat sedert begin verlede jaar voorgekom het. Niemand weet hoeveel van die ander 275 pasiënte ook dood is nie. Die epidemie is deur een spesifieke stam van die bakte- rie veroorsaak en kenners meen daar is net een bron van besmette voedsel wat wyd versprei word, of andersins verskeie produkte wat uit een besmette verwerkingsaanleg versprei word.
KRY JY SEIN?
Agri Noordwes doen ’n beroep op alle boere in dié provinsie wat probleme met ’n data- of selfoonsein op die Vodacom-netwerk ervaar, om dit teen 3 Maart soveel kere moontlik by die hulpnommer 082 111 aan te meld. Kry verwysingsnommers en stuur dan al jou klagtes, die verwysingsnommers, die Vodacom-nommers wat jy gebruik en die gebied waar die probleme ondervind word, na naudepienaar@
vodamail.co.za. Agri Noordwes vergader op 6 Maart met Vodacom en wil ’n lys van aangemelde klagtes aan die maatskappy oorhandig en die klagtes bespreek.
WURM-OPMARS
Die herfskommandowurm kom reeds wyd in Limpopo, dele van Mpumalanga, by Richmond in KwaZulu-Natal, Oos-Londen in die Oos-Kaap, by Brits in Noordwes en enkele plekke in Gauteng noord van Pretoria voor. Boere in die Vrystaat, Wes- en Noord-Kaap moet egter nie gerus wees nie, sê mnr. Jan-Hendrik Venter, bestuurder van plantgesondheid by die Departement van Landbou, Bosbou en Visserye, want dis nie verniet dat die wurm die herfskommandowurm heet nie. Nou is die seisoen wanneer boere hul waarneming veral moet opskerp om die plaag te identifiseer en te bestry. “Dit is moeilik om
WEELDERIG
Twee wolboere van Wakkerstroom het verlede week die nasionale rekordprys vir wol verbeter toe van hul superfynwol (15,6 mikron) op die wolveiling van CMW/OVK vir R216,80/kg verkoop is ten spyte van ’n laer mark vir fynwol. Volgens die Cape Wools-markverslag vir die veiling van 21 Februarie is die baal aan Standard Wool verkoop. Die boere, mnre. Hans en Kerneels Greyling, het die wol onder die Kerneels Trust verkoop en het ’n skoon opbrengs van 72,8% behaal. Die skoon prys was R297,80/kg.
MEER MAKADAMIAS
Volgens die nuutste skatting vir Suid-Afrika se makadamia-oes vir 2018 kan plaaslike kwekers vanjaar 54 000 ton neute (in die dop) met ’n neutkernvoginhoud van 1,5% lewer. Dit is 21% meer as verlede jaar se oes van 44 610 ton. Die 2018-skatting is afwaarts aangepas van ’n aanvanklike skatting van 56 000 ton in Desember, maar kwekers verwag dat die gehalte van makadamias goed sal wees. Mnr. Barry Christie van die Suid-Afrikaanse Makadamiakwekersvereniging sê in ’n verklaring die vraag na neutkern word al hoe groter. Minstens 55% van die 2018-oes sal uitgekraak word teenoor 49% verlede jaar.