Hoenderboere hoor niks oor vergoeding
TEEN Julie volgende jaar behoort Suid-Afrika se hoenderbedryf weer die volle aantal broeihoenders te hê soos voor die uitbreking van die hoogs aansteeklike pluimveevirus H5N8, het dr. Charlotte Nkuna, voorsitter van die Suid-Afrikaanse Pluimveevereniging (SAPV), gesê.
Nkuna en haar span het die Parlement se portefeuljekomitee vir landbou, bosbou en visserye op die hoogte gebring van die huidige situasie ten opsigte van pluimvee. Die bedryf het ’n verlies van R954 miljoen gely en meer as 1 300 mense het hul werk verloor. Die totale waarde van die hoenders wat geslag en eiers wat vernietig moes word, is R307,15 miljoen.
Nkuna het gesê die aantal hoenders moet weer opgebou word op die plase waar die hoenders weens die virus geslag moes word, wat weer tot tekorte gelei het. “Dit is waarom dit langer as gewoonlik duur vir die siklus om na normaal terug te keer.”
SIEKTEGEVAAR
Sy het ook aangedui dat ’n kwartaallikse opname by kleinboere vir die derde kwartaal van verlede jaar toon dat hulle sedert die tweede kwartaal ’n 59%-afname in produksie beleef het. Dit was weens die voëlgriepvirus, maar sommige boere staak ook hul boerdery in die winter omdat die gevaar van siektes dan baie hoog is.
Gewoonlik begin dié boere weer in die somer boer om die Kersfeesmark te betree, maar daar was nie genoeg dagoudkuikens om aan hulle te lewer nie. Hoewel ’n opname van die vierde kwartaal nog onderweg is, kan ’n mens aanvaar dat die afname in produksie voortgeduur het.
VERGOEDING
Onderhandelings is aan die gang met die Land Bank en die nywerheidsontwikkelingskorporasie (IDC) om die bedryf te help om vergoeding vir verliese te finansier.
Dr. Ziyanda Majokweni, ’n direkteur by die SAPV, het gesê die Departement van Landbou, Bosbou en Visserye het die voorgestelde riglyne vir vergoeding gepubliseer. Die probleem is egter die besonderhede van die kwessies wat mense opgelos wil hê en wat hulle moet aandui.
“As ons byvoorbeeld vergoedingskemas vir beheerde siektes tot stand bring, is die punt dat ons aansporings bied vir vroeë opsporing en aanmelding. Wanneer jy ’n riglyn vir vergoeding saamstel, moet dit daardie aspekte aandui.”
Majokweni verduidelik dit so: Stel jou voor ’n boer het ’n paar hoenderhuise wat deur die virus geraak is. Die virus is by hoenderhuis nommer een ontdek en die hoenders by hoenderhuis nommer twee en drie word aangesteek. Daardie boer moet dan vergoeding kry vir die hoenders in al drie huise wat siek geword het en geslag moes word.
Dié tipe besonderhede moet nog met die departement uitgestryk word. Die bedryf sal voorgestelde riglyne aan die departement stuur sodat daar duidelikheid kan wees oor wat die vergoeding eintlik moet vermag.
Intussen word nog met Amerika en Brasilië onderhandel om bevrugte eiers na Suid-Afrika in te voer.