DIEANDERSÊ
DIE gesette JoJo-tenk is vinnig besig om die nie-amptelike gelukbringer van Suid-Afrika se waterkrisis te word, met nagenoeg twee miljoen van dié tenks wat tans in die land in gebruik is.
Die maatskappy – genoem na mnr. Johannes Joubert, ’n boer van Groblersdal wat dit in die 1970’s gestig het – word besit deur die Oppenheimer-familie se beleggingsgroep Stockdale Street, saam met Rand Merchant Bank, Pan African Private Equity Fund Managers en senior JoJo-bestuurslede.
Die Oppenheimers het in Jojo belê met ’n breukdeel van die $5,1 miljard (R40 miljard) wat hulle verdien het uit die verkoop van hul 40%-aandeel in De Beers aan Anglo American in 2011.
Stockdale het Jojo in 2012 by ’n Investec-konsortium gekoop. Build It, ’n netwerk van 300 ysterwarewinkels, het ’n 500%-groei in sy verkope van JoJo-tenks aangeteken oor die vyf jaar tot einde 2016.
Die groei in die huidige boekjaar sal waarskynlik die groei in 2016 ewenaar, sê mnr. Grant Neser, JoJo se besturende direkteur, weens die huidige droogte in Kaapstad, waar verbruikers tot vier maande kan wag vir só ’n watertenk.
Die huidige groei sal JoJo se oorheersing van Suid-Afrika se groeiende mark vir watertenks konsolideer. Volgens sy eie assessering beheer hy meer as die helfte van die mark, wat hom reeds weerstand van die Mededingingskommissie op die hals gehaal het. Die kommissie het onlangs JoJo se beoogde samesmelting met ’n ander vervaardiger verbied.