EERSTE OESSKATTING VERRAS
VANJAAR se eerste amptelike mielie-oesskatting is ’n verrassend optimistiese 12,22 miljoen ton. Dit is nagenoeg ’n miljoen ton meer as wat vooraf voorspel is.
Dit is ook ’n gemaklike 1,7 miljoen ton meer as Suid-Afrika se jaarlikse plaaslike verbruik van sowat 10,5 miljoen ton.
Die geskatte sojaboon-aanplanting, wat in die voorlopige skatting ’n maand gelede al die meeste hektare tot nog toe bestaan het, is tot ’n nuwe rekord van 775 300 ha verhoog. Dit verteenwoordig ’n uitbreiding van sowat ’n derde van verlede jaar se beplante oppervlakte. Dié beraamde eerste oesskatting is 1,375 miljoen ton, ook die grootste oes tot nog toe.
Markontleders het voor die Oesskattingskomitee se vergadering op 27 Februarie bespiegel dat die eerste produksieskatting vir mielies 11,2 miljoen ton tot 11,3 miljoen ton behoort te wees. Die Internasionale Graanraad se eerste skatting van Suid-Afrika se mielie-oes was 11,8 miljoen ton.
GROOT DALING
Die komitee se skatting van 12,22 miljoen ton mielies is nogtans 27% minder as verlede jaar se rekordoes van 16,8 miljoen ton. ’n Opgehoopte 6,4 miljoen ton daarvan is in Januarie as eindvoorraad van die vorige jaar aangeteken.
Die komitee het sy voorlopige mielie-oppervlakteskatting van verlede maand net effens afwaarts aangepas tot 2,303 miljoen ha. Dit is 6 500 ha minder as die voorlopige skatting in Januarie.
Die witmielie-oesskatting is 6,108 miljoen ton – amper 40% minder as verlede jaar s’n. Die geelmielie-oesskatting is 6,115 miljoen ton – net 12% minder as verlede jaar s’n.
Die aantal hektaar onder sonneblomsaad, waaroor daar tot dusver nog groot onsekerheid was, staan op ’n geskatte 584 900 ha, 8% minder as verlede jaar. Die eerste oesskatting vir dié gewas is 731 505 ton.
Die geskatte grondboon-aanplantings is 56 300 ha, net 300 ha meer as verlede jaar, en die verwagte oes is 88 850 ton, wat minder as verlede jaar se 92 050 ton is.
Sorghum-aanplantings word geraam op 24 800 ha, wat 41% minder is as verlede jaar. Droëboonaanplantings is sowat ’n kwart meer as verlede jaar – sowat 56 600 ha.