RCL GROEI DANKSY GROOT OESTE
DIE vorige seisoen se goeie mielie-, soja-, grondboon- en sonneblomoes en ander oeste het groot kostevoordele vir die gediversifiseerde RCL Foods meegebring.
Goedkoper mielies en soja was tot voordeel van die voeren hoendereenhede, terwyl hy grondbone gebruik vir sy Yum Yum-grondboontjiebotter en sonneblom vir sy Nola-mayonnaise.
Die genoteerde maatskappy se kernverdienste het in die halfjaar tot Desember verlede jaar met 56,9% tot R644,7 miljoen gestyg.
Sy sakebedrywighede is verdeel in eenhede vir hoender, suiker, kruideniersware, dierevoer (troeteldierkos en veevoer) en logistiek.
Ná die hoenderbedryf se moeilike 2016 met ’n vloed van goedkoop, ingevoerde Europese hoender en rekordhoë voerpryse, het RCL se hoendereenheid in sy jongste halfjaar ’n groot ommeswaai beleef danksy laer voerpryse, maar ook nadat hy sekere aanlegte gesluit en mense afgelê het.
Die hoendereenheid het sowat ’n kwart tot die totale verdienste voor rente, belasting, waarde- vermindering en afskrywings (ebitda) bygedra en die suikereenheid 18%.
Mnr. Rob Field, finansiële hoof, sê die maatskappy het in albei bedrywe geïnvesteerde vermoëns wat nog gemaksimaliseer moet word.
Die eenhede se bydrae tot totale verdienste sal na verwagting die volgende vyf of tien jaar afneem, soos wat die maatskappy meer in ander gebiede belê.
Albei eenhede se bydrae sal egter betekenisvol bly, sê Field.
INVOER EN VOËLGRIEP
Goedkoop ingevoerde hoendervleis bly ’n bekommernis vir die hele bedryf, selfs al was invoer uit Europa verlede jaar klein danksy voëlgriep daar.
Verder, met die Suid-Afrikaanse winter op pad, sê Field voëlgriep hier is ’n groot bedreiging, veral in die Wes-Kaap.
RCL het 5% van sy teelvoorraad weens die siekte verloor.
“Op sigwaarde van die hoendereenheid se (finansiële) herstel sien ’n mens nie die beduidende koste wat ons aangegaan het om onsself nog meer teen die siekte te beskerm nie.”
Dit sluit strenger protokols vir biosekerheid en groter koste vir sanitasie in.
In die algemeen het die uitbreking van voëlgriep RCL se voereenheid weens ’n laer vraag na voer benadeel.
HERSTEL NÁ DROOGTE
In die suikereenheid herstel produksie nog ná die droogte.
Die bedryf is verlede jaar swaar getref toe die Regering sowat vier maande met beskermende invoertariewe gesloer het. Dit het tot ’n vloed invoer gelei sodat die bedryf teen uitvoerpariteit moes uitvoer.
Field sê te oordeel na die jongste politieke uitsprake klink dit of daar van die owerhede se kant af ’n gunstiger ingesteldheid is jeens die landbou, sake en plaaslike vervaardiging, maar die bewyse daarvan sal nog eers gesien moet word.
“Die hoender- én die suikerbedryf kan groot werkskeppers wees en is mededingend wêreldwyd wat koste betref. Daar is geen rede waarom daar werkverliese hoef te wees nie.”