FOSFORSUUR WEER BESKIKBAAR, SÊ FOSKOR
FOSKOR sê sy produksie van fosforsuur verloop weer glad ná probleme tydens roetine-onderhoud by ’n swaelsuuraanleg einde verlede jaar. Onderbrekings in die beskikbaarheid van fosforsuur het kunsmis- en voervervaardigers ontwrig.
Mnr. James Morotoba, hoof van mynbedrywighede, korporatiewe sake en mensekapitaal by Foskor, het by navraag gesê die fosforsuuraanleg in Richardsbaai was verlede jaar deurlopend in produksie en kon in al sy kliënte se behoeftes voorsien.
Die situasie het egter laat November en begin Desember verander toe verskeie swaelsuuraanlegte vir beplande onderhoud toegemaak is. Wanneer dit gebeur, word minder fosforsuur gelewer.
Morotoba sê die sluiting van die aanlegte word lank voor die tyd beplan en groot kliënte word in die begin van die seisoen daaroor ingelig.
“Dit word altyd met die planttyd gesinchroniseer om die beskikbaarheid van produkte te ver-
seker wanneer dit die nodigste is.”
Omdat Foskor se kommunikasie sekere kliënte nie bereik het nie, word nou planne beraam om wyer te kommunikeer wanneer die onderhoud weer gedoen word.
AGTERSTAND INHAAL
Foskor het probeer om ’n balans te vind tussen die produksie van fosforsuur vir verkope en vir die omskakeling na korrelkunsmis. “Die herstelwerk aan een van die aanlegte het egter langer geduur, hoofsaaklik weens ’n vertraging in die aflewering van onderdele met ’n lang lewertyd.”
Foskor kon volgens Morotoba intussen, met planttyd verstreke,
sy agterstand met produksie inhaal. Hy sê die tekort aan fosforsuur in Desember was ’n eenmalige gebeurtenis wat in die toekoms voorkombaar behoort te wees.
Foskor het nou die struktuur hersien waarvolgens hy onderhoud en aanlegsluiting beplan en uitvoer. “Dit behoort ons in staat te stel om moontlike staantyd te verminder of te voorkom en ons gemiddelde tyd van herstel te verkort.
“Ons verbeter ook ons verkrygingsondersteuning om seker te maak dit strook met ons onderhoudsbehoeftes vir die bestuur van onderdele met ’n lang lewertyd.”