‘BETREK VERBRUIKER OM INVOER TE STUIT’
AS Jan en alleman plaaslike hoendervleis pleks van ingevoerde hoendervleis koop, sal dít ’n groter invloed hê om invoer te stuit as wat handelsreëls kan vermag.
Só het me. Imameleng Mothebe, senior bestuurder vir nywerheidsontwikkeling by die Departement van Handel en Nywerheid, op ’n pluimveeforum van Proudly SA gesê.
Mnr. Eustace Mashibye, uitvoerende hoof van Proudly SA, sê dié organisasie kan die bedryf se propagandamasjien wees.
Verskeie belanghebbendes by die volhoubare voortbestaan van die plaaslike pluimveebedryf, waaronder Nando’s, die FairPlayteenstortingsbeweging, groot pluimveeprodusente, soos Astral, Country Bird Holdings en Daybreak, asook opkomende hoenderboere het die forum bygewoon.
Me. Tracy Davids, koördineerder vir bedryfsvlakontleding van die Buro vir Voedsel- en Landboubeleid (BFAP), sê omdat verbruikers van groot uitvoerlande borsvleis verkies en hul produsente dus tot elke prys van ander snitte ontslae wil raak, sal hulle na verwagting hierheen bly uitvoer.
Mnr. Francois Baird, FairPlaystigter, het voorgestel dat mnr. Nhlanhla Nene, nuwe Minister van Finansies, gevra word dat geen BTW op Suid-Afrikaanse hoendervleis gehef moet word nie.
SPEELVELD GELYK
Davids sê navorsing toon dat Suid-Afrika een van die kostedoeltreffendste pluimveebedrywe het. Die land ding nie so goed met die groot uitvoerlande, soos Brasilië, Argentinië, Amerika en die Oekraïene, mee nie, maar redelik goed met die Europese Unie (EU).
Suid-Afrika se sojameel neig om duurder as die res van die wêreld s’n te wees, maar sedert baie geld in parsaanlegte belê is, het die koste begin daal.
Suid-Afrika voer dus nie hoendervleis in omdat hy onmededingend is nie, maar omdat sy bemarkingstrategie, oftewel verbruikers se eetgewoontes, verskil van dié van ander lande.
Verskeie sprekers het ’n beroep gedoen dat die speelveld minstens gelyk gemaak moet word, onder meer rakende streng verpakkingsvereistes waaraan plaaslike produsente moet voldoen. (Sien die berig en foto’s hiernaas.)
TARIEWE?
Volgens Mothebe het die Kommissie vir Internasionale Handelsadministrasie (Itac) sy werk voltooi rakende ’n aansoek om ’n beskermingsmaatreël in te stel vir hoendervleis uit die EU. Die voorlopige tarief van 13,9% het reeds middel verlede jaar verval.
Die ministers van handel binne die Suider-Afrikaanse Ontwikkelingsgemeenskap (SAOG) moet nou samesprekings voer oor moontlike beskermingsmaatreëls wat ingestel kan word.