HERSTEL NÁ DROOGTE STEUN GOEIE VEILINGSPRYSE
DIE Suid-Afrikaanse vleisbedryf het hom heeltemal misgis met die uitwerking van die afgelope landwye droogte op die veestapel.
“Die tradisionele 20 miljoen ooie (in die nasionale veestapel) is seker nader aan 15 miljoen en die sowat 13 miljoen koeie nader aan 10 miljoen of selfs minder,” sê dr. Cobus Oberholster, hoof van BKB se afdeling vir lewende hawe, veilings en eiendomme.
Hy meen die landwye kuddebouproses gaan nog lank duur, wat ’n groot tekort aan verhandelbare diere teweegbring. Dié tekorte beteken egter dat produsente in die volgende twee tot drie jaar goeie pryse vir veilingsen teeldiere kan verwag.
Mnr. Danie Vorster, bestuurder van Merino SA, sê voorlopig is Merinoveilingspryse tot dusver dié jaar gemiddeld 20% hoër as verlede jaar.
Hy sê die beter veilingspryse is moontlik danksy die reën wat veral in die noordelike en oostelike dele van die Oos-Kaap geval het en tot optimisme in die bedryf kan lei. Hy sê pryse is egter steeds laer in dele waar dit nog droog is.
Hy sê dit het lank laas so goed met die Merinobedryf gegaan as tans. “In goeie toestande maak die Merinoboer nou baie goeie geld; ek sou sê die beste in die kleinveebedryf.”
WOL ÉN VLEIS VAAR GOED
Me. Karabo Takadi, landbou-ekonoom by Absa, sê die gunstige wolmark word tans aangedryf deur ’n vraag na wol van goeie gehalte en fyner wol, veral uit China. Sy verwag dat dié optimistiese sentiment vir die volgende 5-15 jaar sal voortduur.
Na verwagting sal die Suid-Afrikaanse woloes in 2017-’18 nagenoeg 7% laer wees as die vorige seisoen se 52,5 miljoen kilogram – een van die bestes die afgelope dekade.
Vorster sê afgesien van die nadraai van die droogte word die klein veilingsaanbod veroorsaak deur ’n swak lammeroes in minder droë gebiede, sowel as onverwagse koue laat verlede jaar wat tot verdere vrektes gelei het.
Oberholster sê volgens verteenwoordigers van voerkrale word baie verskalwers steeds bemark deur boere wat ’n nypende kontantvloeitekort het.
Oberholster sê die verbruikersbesteding van die LSM-groepe 7 tot 10 styg jaarliks met 6-7%, wat die vraag na rooivleis ondersteun. “’n Bykomende bonus vir die veebedryf is die huidige Twee Merinoveilings wat daarvan getuig, is dié van die Konsortium-groep en HeuningkransMerino’s.
Op die Konsortium-groep se onlangse veiling is 472 ramme teen gemiddeld R8 158 stuk verkoop. Altesaam 198 ooie is teen gemiddeld R2 321 stuk verkoop.
Telers uit Lesotho het ’n groot persentasie van die ramme en ooie op Heuningkrans se veiling gekoop. Die gemiddelde prys vir die aanbod van 137 ramme op die veiling was R9 929, bykans R2 000 per ram meer as verlede Augustus en bykans R3 000 per ram meer as op die ooreenstemmende veiling verlede jaar. Die gemiddelde prys van ooilammers was R1 776,87, terwyl die ander ooie gemiddeld R2 655 stuk behaal het.