SÓ VEG AVOKADO SY PAD OOP TOT IN DIE KALKLIG
Geen hipster met selfrespek begin sy dag sonder fyngemaakte avokado op roosterbrood nie (en hy vergeet beslis nie om ’n foto daarvan op Instagram te plaas nie). Die Australiese eiendomsmagnaat Tim Gurner het selfs al gesê die avokado-gier is een van die redes waarom jong mense nie huise kan bekostig nie.
Op die onlangse Fruit Logistica in Berlyn is daar verskeie kere na die “avo-fenomeen” verwys. Saam met produkte, soos sagtesitrus, bessies en neute, het avokado’s superkosstatus bereik, wat ook ’n beduidende invloed op die wêreldhandel in vars produkte het.
Maar avokado’s was nie altyd so gewild nie. Dié romerige vrug met sy leeragtige skil het die wêreld eers die afgelope paar jaar oorrompel – en byna ’n revolusie in die vrugtebedryf ontketen.
Dit was ’n baie interessante reis, vertel mnr. John Valentine, voorsitter van Red Communications in Brittanje. Sy maatskappy spesialiseer in bemarking en skakelwerk vir die varsproduktebedryf en het in 2005 opdrag gekry om avokado’s op die voorgrond te plaas.
“Ons moes natuurlik gaan kyk na die belangrikste voordele van avokado’s, en dit ís ’n wonderlike produk, met al die goeie vette, foliensuur, kalium en dies meer.
“Ons moes ook gaan kyk hoe verbruikers die produk sien, maar ook weet dat verbruikers besluite neem op grond van persepsies, en nie noodwendig die werklikheid nie,” het hy op die Fruitnet World of Fresh Ideas-konferensie in Berlyn gesê.
Destyds het hulle bevind sowat 4 uit 5 verbruikers in Brittanje het in ’n jaar se tyd nooit ’n avokado gekoop nie, want hulle het gedink dit is die ongesondste vars produk wat bestaan. Die organisasie Weight Watchers het dit ook verbied omdat dit te veel kilojoules sou bevat.
“Een ou het dit beskryf as die Mars-stafie van die varsproduktebedryf! Ons moes dus die wanpersepsies regstel en die regte boodskap aan mense oordra.”
Dít het hulle reggekry deur samewerking en geïntegreerde veldtogte met verskaffers en kleinhandelaars. Dit was gerig op opvoeding – die gesondheidswaarde, wat om met avokado’s te doen en hoe om dit te geniet. Aandeteklubs vir kosbloggers was ook ’n groot treffer.
Daarmee saam het produsente hul bes gedoen om avokado’s se gehalte ’n hupstoot te gee. Tegnologie (wat byvoorbeeld die rypheidsgraad toets), protokolle en kleinhandelaars se standaarde het gehelp om beter produkte op die rak te plaas.
“Die mark in Brittanje het die afgelope vyf jaar met 150% gegroei. Deesdae is daar omtrent nie ’n restaurant in Londen wat nie avokado en geposjeerde eier op sy spyskaart aanbied nie,” sê John.
“Produsente het daarop gereageer en daar word tans baie aanplantings gedoen.”
Hy meen die verspreiding in die mark is steeds relatief laag, en daar is nog baie oemf in avokado’s oor.
“Daar is baie mense wat steeds nie avokado’s eet nie. Die groei sal nie hier ophou nie, maar sal aanhou. Dit sal dalk nie 50% per jaar wees nie, maar ek raam dit op sowat 20% tot 25%.”
‘Een ou het dit beskryf as die Mars-stafie van die varsproduktebedryf!’