NEDERLANDSE VOERBEET NOU IN SUID-AFRIKA
KULTIVARSAAD ’n Nuwe voerbeetkultivar, Brigadier, is nou beskikbaar vir Suid-Afrikaanse veeboere wat hul voervloeiprogram wil verbeter en voorsiening vir die moeilike tye wil maak wanneer veevoer skraps is.
Die saad word deur Joined Specialised Farming (JSF) in Bapsfontein van Nederland af ingevoer, waar dit deur die saadmaatskappy Joordens Zaden ontwikkel is. Die kultivar is baie gewild in Nederland en is reeds die voorste verkoper in NieuSeeland.
Dit word deur ’n oranjekleurige knol gekenmerk en word gewoonlik teen ’n digtheid van 90 000 tot 100 000 sade per hektaar gesaai. Dit het ’n opbrengs van sowat 240 ton/ha en kan volgens JSF vir tot sewe maande teen ’n belading van 300 grootvee-eenhede per ha bewei word.
Voerbeet kan ’n belangrike rol in Suid-Afrika speel wanneer boere dikwels in die droë seisoen en veral tydens droogtes sukkel om ’n voervloeiprogram in stand te hou. Danksy moderne genetika word nuwe kultivars ontwikkel en verbeter sodat dit ’n groot aantal vee op ’n klein oppervlakte kan kos gee.
Voerbeet is een van die voergewasse wat die hoogste opbrengs lewer. Op ’n droëmateriaalgrondslag lewer Brigadier 20-40 ton/ha, vergeleke met voerrape se 3,5-4 ton/ha, voermielies se 15-18 ton/ha en lusern se 10-12 ton/ha.
Brigadier is baie voedsaam. Dit bevat 12 MJ energie per kilogram droëmateriaal (DM) en 11-13% ruproteïene. Dit vergelyk dus goed met voerrape se 10-11 MJ energie per kg en 19-20% ruproteïene, lusern se 10 MJ energie per kg (droëmateriaal-grondslag) en 17-22% ruproteïene en voermielies se 10,5-11,5 MJ energie per kg en 9-10% ruproteïene.
Die saad ontkiem betreklik stadig en die saailinge kom eers sowat drie weke nadat dit geplant is te voorskyn. Die groei en ontwikkeling van die gewas wissel na gelang van die grondtipe en klimaat. Boere behoort deskundige, agronomiese raad te bekom. Prys: R3 000/ha. carl.bischoff@yahoo.co.za; 082 450 6154.