CHRIS VAN DIJK
UIERS
Die volgende is moontlike oorsake van uiers wat nie vul nie: Inwendige parasiete. Suboptimale voeding voor en nadat die koei gekalf het, veral ’n tekort aan kalsium en proteïene. Kliniese of subkliniese mastitis. Oormatige stres voor en tydens kalf. Vergiftiging, soos fluoried in die drinkwater.
AFNAME IN MELK
Die volgende is moontlike oorsake van ’n skerp afname in melkproduksie: Kliniese of subkliniese mastitis. Die inname van sekere gifplante. Die inname van mikotoksiene (swamme) vanaf die weiding of voer. Te hoë nie-proteïenstikstofvlakke in die voer. Die oorvoer van veral graan met gepaardgaande suurpens. Vitamientekorte. Ongebalanseerde rantsoene, veral vroeg in die laktasie. Infeksie- en bosluisoorgedraagde siektes. Te min water.
KORT LAKTASIES
Die volgende faktore kan tot kort laktasies lei: Koeie wat oormatig vet is (kondisietelling van meer as 4). Ondervoer. Onvolledige verwydering van melk. Genetiese oorsake. Die oorsaak van ’n skielike afname in en selfs ’n totale staking van melkproduksie is dikwels gekoppel aan een of meer oorsaak.
Die beste mens om hierdie probleem op te los, is die kuddeveearts. Hy of sy sal met inagneming van die dier se geskiedenis, ’n kliniese ondersoek en laboratoriumtoetse ’n diagnose kan maak en dan die korrekte voorkomende maatreëls voorstel en die korrekte behandeling voorskryf. Dr. Chris van Dijk is die uitvoerende hoof van die Melkprodusente-organisasie (MPO).