Massey Ferguson se Global-reeks bestaan uit geharde trekkers wat nie terugstaan vir veeleisende, algemene plaaswerk nie.
Die reeks Global-trekkers is veelsydig, betroubaar en spog met doeltreffende brandstofverbruik en puik spesifikasies in die 6198 kW-segment.
Die oorkoepelende reeks Global-trekkers is die afgelope drie jaar plaaslik bekend gestel. Dit bestaan uit die MF 4708 (61 kW), die MF 5700-reeks (68 kW en 76 kW) en die MF 6700-reeks (82 kW, 91 kW en 98 kW).
Die twee- of vierwielaangedrewe MF 4708 is beskikbaar met ’n semi-platform en die vierwielaangedrewe MF 5700- en MF 6700-reeks met ’n platform of ’n kajuit.
WOEMA
Die turbo-aangedrewe AGCO Power-enjins van 4,4 liter met vier silinders sorg vir hoë kraglewering en wringkrag. Aangeslane kraglewering word teen lae omwentelinge bereik, wat brandstofverbruik verlaag en help om ’n lang gebruiksduur met ’n lae instandhoudingskoste te verseker.
Die trekkers is toegerus met ’n 12x12-transmissie met gesinchroniseerde heen-en-weer-skakeling. Dit is beskikbaar met ’n meganiese spoelkas (shuttle) of wisselaar met ’n droë koppelaar of ’n Power Shuttle met ’n nat, olieverkoelde koppelaar vir elektro-hidrouliese vorentoe-en-tru-skakeling. Die Power Shuttle maak ratverwisseling in die ry moontlik.
VOORDELE
Die elektro-hidrouliese inskakeling van vierwielaandrywing is moontlik met die druk van ’n knoppie. Die in- en uitskakeling kan in die ry gedoen word. Die trekkers bied ’n hysvermoë van tot 5,5 ton. Vir meer veelsydigheid is row crop-wiele by die twee groter reekse beskikbaar.
VOETSOOLVLAK
“Met die Global-reeks bring ons ’n praktiese trekker plaas toe wat by uitstek in plaaslike behoeftes vir trekkers onder 100 kW voorsien,” sê mnr. Coenraad Oosthuizen, nasionale verkoopsbestuurder vir Massey Ferguson by BHBW (voorheen Barloworld Agriculture).
“Dit is eenvoudige trekkers met basiese tegnologie – maklik om mee te werk en om in stand te hou – maar bykomende spesifikasies verhoog kostedoeltreffende werkverrigting en maak die trekkers veelsydiger.”
Soos die res van die Massey Ferguson-trekkers is hierdie modelle beskikbaar met ’n BHBW-diensplan vir drie jaar of 2 000 uur. www.masseyferguson.co.za; 011 898 0074.