‘Daar is altyd drome om na te jaag’
Mark le Roux, Waterford se wynmaker wat pas as Jong Wynmaker van die Jaar aangewys is, is al van jongs af geboei deur die invloed van terroir op die gehalte en produksievermoë van wingerde.
Jy kan seker maar sê ek is ’n gebore terroir-is, sê Mark le Roux (32), wat einde verlede jaar aangewys is as die Jong Wynmaker van die Jaar in Tim Atkin se gesaghebbende Suid-Afrikaanse Spesiale Verslag.
Toe Mark in 2013 deur sy mentor, Kevin Arnold, as wynmaker by die Stellenbosse landgoed Waterford aangestel is, was dit ’n groot droom wat bewaarheid is. Maar nou, vier jaar later, met dié eerbewys, besef hy daar sal altyd drome wees om na te jaag.
“’n Mens kan sê ek is gebore om terroir te waardeer. My pa was betrokke by bosbou. Grond en plante was daarom altyd in die omtrek, of dit nou gesprekke aan tafel was of uitstappies in die natuur.
“As ’n laaitie het ons tyd in Maleisië en Indonesië deurgebring en dit het my belangstelling in die wêreld se diverse plantlewe en groeisiklusse net aangevuur.”
Op Waterford, in die Helderberg-wynstreek, kry hy elke dag hiermee te doen.
“Waterford se grond is ongelooflik. Daar is graniet, Tukulu en selfs Oakleaf. Namate ek die plaas beter leer ken het, was ek egter verbaas om uit te vind hoe arm is die gronde hier, en in die algemeen in die Helderberg-streek. Klipperig. Rotse. Ondeurdringbare dele. Dat die wingerde sulke fantastiese vrugte in hierdie toestande dra, bly een van die redes waarom wynmakery en wynboerdery my so boei.”
Vir enige ander wynmaker kan dit na ’n moeilike taak klink om wyn aan ’n breë front te maak – van Cap Classique tot Cabernet sauvignon, Pinot noir, Shiraz, Chardonnay en natuurlik die bekende The Jem (rooi versnit). Maar vir Mark is dit ’n voorreg en onuitputlike bron van opwinding.
“Dit hou jou op jou tone. Of ons nou wyn maak van ons eie Waterford-druiwe of van vrugte wat ons in Elgin verbou, ek en die kelderspan weet ons werk met die heel beste vrugte. Ons het ’n groot doek – ons kan ’n minimalistiese benadering inneem of pret hê en ’n bietjie kreatiwiteit aan die dag lê.
“Solank die eindproduk goed genoeg is vir die Waterford-etiket, word ek toegelaat om my hand aan nuwe dinge te waag.”