WERK IN 2018 SAAM TEEN DIÉ SIEKTE

VANJAAR moet bekend staan as die jaar waarin alle beesboere saamgewerk het om brucellose te bekamp deur alle verse tussen vier en agt maande in te ent, sê dr. Faffa Malan, bestuurder van die Herkouerveterinêre Vereniging van Suid-Afrika (RuVasa).

In die Januarie-verslag oor siektes wat deur veeartse in Suid-Afrika aangemeld is, doen hy ’n dringende beroep op boere om verse met die stam 19- of RB 51-entstof in te ent, soos die wet vereis.

“As alle beesboere dit doen, sal die vrystelling van brucellosebakterieë dramaties afneem,” sê hy. Entstowwe moet streng volgens voorskrifte gebruik word.

Méér inligting is beskikbaar op die webwerf Daar is ook ’n magdom inligting oor hierdie en ander siektes in die rubriek Vra vir Faffa op Landbouweekblad se webwerf

Al ent boere hul vee in teen brucellose, moet hulle steeds waaksaam wees en behoorlike biosekerheidsmaatreëls handhaaf om verdere besmetting te voorkom.

Dit sluit aspekte in, soos om geensins vee te koop wat nie ingeënt is nie en net diere te koop waar die kudde negatief getoets het vir brucellose.

Boere moet ook ’n goeie program vir dieregesondheid volg, hekke toe hou en heinings in stand hou om vreemde vee uit te hou.

Vreemde voertuie moet ook nie in veekampe toegelaat word voor dit gewas en ontsmet is nie.