DG VIR ROL IN ONTWIKKELING VEREER
DIE SA Farmers Development Association (Safda) het ’n senior staatsamptenaar vir sy steun en bydrae tot die ontwikkeling van swart klein- en mediumgroot boere vereer.
Mnr. Lionel October, direkteurgeneraal van die Departement van Handel en Nywerheid, is ook vereer vir sy toewyding om die dooie punt in die suikerbedryf op te los, sê die departement in ’n verklaring.
Safda was ontevrede omdat hy nie deur die SA Suikervereniging (Sasa) en die Suid-Afrikaanse Suikerrietkwekersvereniging (Sacga) erken is nie. Safda verteenwoordig hoofsaaklik begunstigdes van grondhervorming, asook die meeste swart suikerrietboere. Safda het sy saak aan die Parlement se portefeuljekomitee vir handel en nywerheid gestel, wat die departement die mandaat gegee het om ’n spoedige oplossing te vind.
Die departement het sedert 2015 daaraan gewerk en was deel van ’n bemiddelingsproses wat gelei het tot ’n voorlopige samewerkingsooreenkoms, wat in Desember 2017 onderteken is.
Die proses het ook gelei tot voorgestelde wysigings aan die regulasies vir die suikerbedryf en ’n voorgestelde nuwe struktuur om as sambreelliggaam vir suikerrietboere te dien.
October sê die departement se ingryping was daarop gerig om die probleme op te los en die belangrikheid van ekonomiese transformasie in die suikerbedryf te benadruk. “Die nuwe ontwikkelings bied ’n geleentheid vir kleinboere om ’n beduidende bydrae tot die ekonomie te lewer.”
Volgens hom het die departement en die portefeuljekomitee se ingryping daartoe gelei dat die drie organisasies “mekaar gevind het” en hulle daartoe verbind het om saam te werk.
“Safda is nou reg geposisioneer om aandag te gee aan die bekommernisse van klein- en mediumgroot belanghebbendes in die bedryf en om sosiaalekonomiese ontwikkelingsprogramme te bevorder wat tot huidige en toekomstige lede se voordeel sal strek,” sê October.