GRANAATMARK BARS UIT NATE
Die mark vir granate bars steeds uit sy nate en geniet ’n groeikurwe met ’n vraag wat die aanbod aansienlik oorskry.
Mnr. Johan van Niekerk, besturende direkteur van Star South Fruits, sê plaaslike produsente se aanvanklike inkomsteprojeksie was gemiddeld R15/kg, maar weens die uitvoervraag het die werklike prysrealiseringe die afgelope jare tot R20/kg gestyg.
Volgens Van Niekerk verdien kwekers nou sowat R30/kg vir klas een, R18-R25/kg vir klas twee en R10/kg vir verwerkingsgraad.
Volgens die Granaatkwekersvereniging van SA (Pomasa) is tot en met 2016 sowat 872 ha granate hoofsaaklik in die Wes-Kaap aangeplant. Die meeste aanplantings is in Malmesbury, in die omgewing van die Bergrivier, Bonnievale en die Klein-Karoo, asook in gebiede om Stellenbosch, Piketberg, Langkloof-Wes, in die Oos-Kaap en KwaZulu-Natal. Die uitvoer van granate het sedert 2012 (436 669 kartonhouers van 4,3 kg elk) toegeneem tot bykans 1,2 miljoen kartonhouers in 2016.
Volgens Van Niekerk is die leeue-aandeel daarvan na Europa, waar die vraag na granate toenemend styg, danksy die toename in die aantal Moslems, vir wie granate ’n belangrike voedselbestanddeel van ’n vegetariese dieet vorm. Aan die ander kant is die tradisionele Europeërs terdeë bewus van die hoë voedings- en gesondheidswaarde van granate. Die glinsterende vrugte is propvol antioksidante, vitamiene en yster.