DIÉ WEEK IN DIE LANDBOU

DOLLEEG

Die Bergrivier in die Paarl droog sedert Januarie stadigaan op nadat die sluise van die Bergrivierdam gesluit is om in die droogte water te bespaar. Gesamentlike damvlakke in die Wes-Kaap was teen druktyd 21,3%. Mnr. Anton Bredell, die Wes-Kaapse minister van plaaslike regering, omgewingsake en ontwikkelingsbeplanning, sê meer as R100 miljoen is reeds as droogtehulp aan boere betaal. “Selfs al reën dit katte en honde, moet ons nou daarna streef om deur die somer van 2018-’19 te kom.”

UITSKIETERS

Gina, ’n Zambiese swartwitpenskoei wat dragtig is by Busanga, ’n Zambiese bul met horings van oor die 50 duim, het R210 000 behaal op die onlangse Vyfster-wildveiling van mnr. Dries Visser by Bela-Bela. Visser se swartmasker-swartwitpense was gewild onder kopers en het beter pryse as ander swartwitpense gehaal. Ander genooide verkopers het egter van hul diere teruggehou op die veiling nadat party Zambiese kruisswartwitpense skaars R35 000 gehaal het. Die veiling se omset was R26 miljoen. Landbouweekblad berig volgende week volledig hieroor.

UNIES MOBILISEER

Die Food and Allied Workers’ Union (FAWU), gesteun deur die federasie vir vakbonde (SAFTU), beplan vandeesweek ’n protesaksie teen onder meer die storting van hoenderprodukte, smokkelhandel in sigarette en drank, asook die suikerbelasting op koeldrank. Optogte na die kantore van die Suid-Afrikaanse Inkomstediens in Pretoria en Durban, asook ’n optog na die Parlement in Kaapstad word vir Dinsdag beplan. Die doel daarvan is om by die Regering aan te dring om werkgeleenthede te beskerm wat as gevolg van hierdie praktyke verlore gaan. Fawu glo die verhoging op aksynsbelasting en BTW sal veroorsaak dat armes meer onwettige sigarette koop. Benewens miljarde rande se verliese aan staatsinkomste gaan talle werkge- leenthede ook in die proses verlore.

MINDER AVOKADO’S

Suid-Afrika het verlede jaar 25% minder avokado’s uitgevoer as in 2016. Van die 43 492 ton wat uitgevoer is, het 69% na Nederland gegaan, 22% na Brittanje, 4% na Spanje, 1% elk na Namibië en Rusland, en 3% na ander lande. Volgens Freshplaza begin Suid-Afrika se oestyd in alle erns in Maart en sal die eerste uitvoerprodukte die Noordelike Halfrond in die middel van Maart begin bereik. Die verwagting is dat heelwat meer as die sowat 1 1 miljoen kartonhouers (4 kg elk) van die vorige seisoen uitgevoer sal word, aangesien verlede jaar nie as ’n goeie jaar beskou is nie. Die droogte het ’n nadelige invloed op produksie gehad en daar is ook nou nuwe aanplantings in produksie.

‘AANVALLER’ GESKIET

’n Vermeende plaasaanvaller wat moontlik met die moord op mnr. Herman Botha, ’n boer van Groblersdal, verbind kan word, is verlede week dood gevind nadat ’n boervrou van die Kalkfontein-omgewing op ’n inbreker in haar huis geskiet het. Die bejaarde vrou het glo in die vroeë oggendure wakker geword toe iemand haar slaapkamerdeur oopmaak. Sy het ’n skoot afgevuur. Die Capricorn Voice berig die lyk van mnr. Thomas Baloyi (25) is later in die boervrou se tuin gevind. Baloyi is op 29 November verlede jaar op borgtog van R1 000 saam met drie ander beskuldigdes in die Botha-saak vrygelaat. Die polisie wou egter nie bevestig of dit wél Baloyi se lyk was nie. Die ondersoek duur voort.

CELINA WORD GROOT

Suid-Afrika se eerste kommersiële oes van die Celina-peer is pas verpak en verskeep. Dis ’n vroegseisoen-kultivar — een van die eerstes wat in Suid-Afrika se uitvoermarkte beskikbaar is — en ondanks die strawwe droogte in die Wes-Kaap het dit ’n oes van goeie gehalte opgelewer, berig Freshplaza. Volgens Stargrow, wat die pere bemark, sal dit veral goed vaar in Europa en die Midde-Ooste, waar daar tans omtrent geen pere met dié blos te kry is nie. Dié Skandinawiese peerkultivar is in 2005 na Suid-Afrika gebring en evaluasie is in 2007 van stapel gestuur.

SONNEBLOM-INVAL

Herfskommandowurms is verlede week op jong sonneblom-aanplantings in Komatipoort opgespoor, sê Graan SA in ’n verklaring. Die wurms raak meer aktief in die herfs. Graan SA moedig dus produsente aan om hul lande gereeld te ondersoek en enige voorkoms of vermoedelike voorkoms van die plaag aan te meld. In Gauteng is daar reeds bevestigde gevalle by Bronkhorstspruit, Cullinan, Vereeniging en Melapong, in Mpumalanga by Witbank en dele van die Nkangala-distrik, in Limpopo in al die distrikte, in Noordwes moontlike gevalle by Brits en Koster, in KwaZulu-Natal by Richmond, Greytown en ander dele en in die Oos-Kaap by Oos-Londen. Meld enige voorkoms van die wurms aan by tel. 012 319

6384 of per e-pos aan by