ESKOM ‘DINK BURGERS IS ONNOSEL’
Die nuusberig “Eskom kan homself in voet skiet met tariefverhoging” (LBW, 27 April 2018) het betrekking.
Ek wil graag by mnr. Deon Conradie, senior bestuurder vir elektrisiteitspryse by Eskom, uitvind of hy dink dat ons as landsburgers onnosel is. Hoe kan hy sê dat Eskom nie in ’n geldelike gemors is weens wanbestuur, korrupsie en staatskaping nie?
Indien Eskom gesonde sakepraktyke toegepas het, sou hy nie nou moes rondskarrel vir geld nie en sou hy nie landbouers onder verdere druk geplaas het nie.
Ek kan nie glo dat Eskom nie kan besef dat indien meer landbouers van alternatiewe kragvoorsiening gebruik maak, sy inkomste nog verder gaan krimp nie.
Conradie sê voorts dat die Nasionale Energiereguleerder van Suid-Afrika (Nersa) seker maak dat slegs elektrisiteitskoste deur die regulatoriese rekeningsklaring-aansoek (RCA) verhaal word. Verklaar dan asb. vir my waarom vaste koste ook verhoog word en nie net elektrisiteiskoste nie indien Nersa ’n verhoging goedkeur.
En hoe is dit dan dat die Nersa-paneel by die openbare sittings nie geweet het wat vaste koste behels nie?
Ek is net ’n doodgewone huisvrou (’n landbouer se vrou), maar ek, soos vele ander, is nie onnosel nie.
Eskom, kry jul huis in orde! AMANDA STEYN