Kleinboere onbewus van Afrika-varkgrieprisiko's
DIE uitbreking van Afrikavarkgriep by Springbok in die NoordKaap word as ’n geïsoleerde geval beskou, maar die varkbedryf en die Departement van Landbou, Bosbou en Visserye het verskeie maatreëls getref om die verspreiding daarvan te beperk.
Sowat 60 varke is teen druktyd van kant gemaak ten einde die verspreiding daarvan te voorkom.
Die Departement van Landbou, Bosbou en Visserye het in ’n verklaring bekend gemaak dié aanmeldbare siekte het voorgekom by 39 varke wat van Kimberley na Springbok vervoer is.
As ’n voorkomingsmaatreël is al die varke wat siek voorgekom het, van kant gemaak. Daar was sowat 80 ander varke op die eiendom.
Epidemiologiese ondersoeke word tans gedoen om vas te stel of die virus op die varkplaas verband hou met vorige uitbrekings van varkgriep in die land.
Dié uitbreking kom buite die beheergebied van Afrikavarkgriep voor. Die beheergebied sluit bykans die hele Limpopo, asook dele van Noordwes en die noordoostelike dele van Mpumalanga in.
RISIKO’S
Dr. Peter Evans, voorsitter van die Varkveeartsvereniging, het die eiendom by Springbok besoek en sy kommer uitgespreek oor die gesondheidsrisiko’s van diere in landelike gemeenskappe.
“’n Groter bewuswording sal onder kleinboere gevestig moet word om siektes, soos varkgriep, hok te slaan,” sê hy. “Gelukkig handhaaf die meeste kommersiële varkboere die nodige maatreëls om die verspreiding van die siekte te beperk.”
Dié varkgriep veroorsaak erge bloeding en gaan met hoë koors gepaard. Meestal vrek ál die besmette varke. Die siekte kan vinnig in ’n trop versprei en diere binne tien dae laat vrek.
Varkgriep tas nie mense aan nie. Die siekte word versprei deur kontak met besmette varke of besmette afvalkos.
Boere en spekulante word aangeraai om varke slegs by betroubare verskaffers of op veilings te koop.
Afvalkos moet ook vooraf ’n uur lank gekook word as voorsorgmaatreël teen die varkgriepvirus of ander siektetoestande.
Ingevolge regulasie 20 van die departement se voorlopige veterinêre prosedurele kennisgewing rakende die bekamping van Afrikavarkgriep word die vervoer van wilde varke ook beheer.
Dié beheer geld die verskuiwing van lewende vlakvarke, bosvarke en wildevarke, asook produkte en karkasse, wanneer dit in of vanaf Limpopo, Mpumalanga, Noordwes, KwaZuluNatal en Gauteng vervoer word.
Dit behels onder meer dat dié diere vooraf vir Afrikavarkgriep getoets en teen uitwendige parasiete behandel word.