Kry só die regte werk
Die landboubedryf bied ’n hutspot van loopbane wat op een doel toegespits is: Om genoeg voedsel, voer en vesel vir die wêreld te lewer. Landbouweekblad het by ’n werwings maatskappy gaan kers opsteek oor loopbaan vooruitsigte in die bedryf.
Hoewel die landbousektor talle werksgeleenthede bied, is dit nie altyd maklik om te weet waar presies dié geleenthede skuil nie. Hetsy jy pas met skool klaargemaak of dalk reeds ’n graad en jare se ervaring het, is dit dikwels moeilik om ’n pos op te spoor wat aan jou verwagtinge voldoen.
Die tradisionele platforms waarop jy na werksgeleenthede kan soek, is steeds relevant. Dit sluit in verwysings en wenke van vriende en kollegas, advertensies in publikasies en webwerwe waarop poste geadverteer word.
Sosiale media is ook toenemend ’n bron van inligting vir werksoekers. Dit plaas egter die onus ten volle op die aansoeker om seker te maak sy of haar kwalifikasies en ondervinding word deur die regte landbou-ondernemings en boerderye raakgesien.
BEKWAAM JOUSELF
Mnr. André Spies, besturende direkteur van Agricruit, ’n werwingsmaatskappy wat spesialiseer in die landbousektor, verduidelik hoe werksgeleenthede in dié bedryf lyk.
“Hoewel sekere landbourigtings oor die jare nie veel verander het nie en moontlik nooit oorbodig sal raak nie, is daar deesdae ’n groter klem op doeltreffendheid. Gevolglik ontstaan nuwe spesialisposte gereeld, terwyl sekere vaardighede minder belangrik raak as voorheen.
“Een van die redes is die outomatisering van prosesse, wat voorheen fisieke arbeid sou gebruik, asook rekenaartegnologie wat al hoe meer gebruik word. Dit is sowel plaaslik as internasionaal die neiging.
“Tegnologie word al hoe meer ingespan vir monitering en ontledings, en satelliete, hommeltuie en sensors word algemeen gebruik. Dié neiging word soms ‘agtech’ of ‘agritech’ in posbeskrywings genoem en vorm tipies deel van presisieboerdery.”
Rekenaargeletterde werksoekers wat met landboutegnologie vertroud is, is daarom meer gesog op plase en in landboumaatskappye.
“Wat internasionale neigings betref, behoort daar in die nabye toekoms ’n groter aanvraag te wees na mense met ’n kombinasie van kennis en vaardighede in landbou én tegnologie,” sê André.
Dié vaardighede sluit in satellietmonitering van gewasse en grondstatus met behulp van satellietbeelde. Die ontleding van data wat deur moniteringstoerusting ingewin word, is ’n nuttige vaardigheid.
Moderne landbou-ondernemeings en gesofistikeerde plase kyk ook al hoe meer na outomatisering, met ál meer geleenthede vir spesialiste in die outomatisering van verskeie prosesse in die landboubedryf.
Benewens dié vaardighede is daar steeds ’n groot vraag na goeie landboukundiges, veral dié wat spesialiseer in spesifieke gewasse en produksieprosesse. Dier- en veekundiges is ook redelik in aanvraag, veral spesialiste, sê André.
“Mense met ’n liefde vir die landbou en ’n talent vir besigheid sal ’n veilige hawe in die landbou kan vind. Verkoopsverteenwoordigers, graanhandelaars en die vermoë om sakeontwikkeling vir landbou- en verwante maatskappye te kan doen, is ook gesog.”
GETUIGSKRIF
André het ’n paar wenke vir veral studente of nuwe toetreders tot die landboumark wat ’n loopbaan in die landbou wil volg.
“’n Werksoeker moet inligting inwin oor die soort beroep en maatskappy waarin hulle hul loopbaan wil begin. Dit is gewoonlik redelik moeilik om aanvanklik te weet presies wat jy wil doen, maar dit is altyd ’n goeie benadering om na te lees oor geleenthede.
“’n Goeie curriculum vitae (CV) is belangrik. Hou in gedagte dat bestuurders hope aansoeke en CV’s kry en nie altyd tyd het om ’n CV van sewe bladsye deur te lees nie. Stel ’n kort CV van een tot drie bladsye lank op met jou belangrikste besonderhede, kwalifikasies, kursusse en opleiding wat jy voltooi het, asook enige werksondervinding. Hou ook ’n langer, meer gedetailleerde CV by as ’n potensiële werkgewer meer inligting wil hê,” sê André.
Sosiale mediaplatforms, soos LinkedIn en Facebook, word al hoe meer deur werkgewers gebruik om meer oor aansoekers uit te vind. Wees dus versigtig wat jy “adverteer”.
“Laastens is dit belangrik dat jy goed voorberei vir ’n onderhoud. Lees soveel as moontlik oor die maatskappy, weet wat die maatskappy doen, en wat van die betrokke persoon verwag sal word. Buiten dat dit aan potensiële werkgewers sal wys jy stel werklik belang, sal dit ook help met jou senuwees.”
‘Mense met ’n liefde vir die landbou en ’n talent vir besigheid sal ’n veilige hawe in die landbou kan vind.’