Bloeitydperk vir SA bloubessies
Die uitvoer van Suid-Afrikaanse bloubessies het met rasse skrede toegeneem. Dit skep goeie geleenthede vir boere. Hulle moet egter in ag neem dat die bessiebedryf kapitaalintensief is en verskeie risiko’s het wat goed bestuur moet word.
Die uitvoer van Suid-Afrikaanse bessies het die afgelope 12 jaar begin toeneem. Die produksie en uitvoer van vrugte van die genus Vaccinium sluit bloubessies, bloubosbessies en bosbessies in.
Die uitvoer van dié bessies het die uitvoer van frambose, swartbessies, moerbeie, loganbessies en aarbeie oorskry.
Die merkwaardige groei in uitvoer in randwaarde het die aandag van beleggers en voornemende bloubessieboere getrek. Die waarde van bloubessie-uitvoer het van ’n geringe R345 000 in 2007 oor ’n tydperk van 12 jaar gegroei en kan na verwagting vanjaar net meer as R1 miljard beloop.
Volgens die nywerheidsontwikkelingkorporasie IDC het Suid-Afrika normaalweg 75% van alle bessieproduksie uitge- voer. Uitvoer het toegeneem om in die groot internasionale vraag na bloubessies te voorsien.
Die Europese Unie (EU) het ’n vryhandelsooreenkoms met Suid-Afrika. Boere en bemarkers uit Brittanje en die EU speel ’n gevolglik groot rol in die vestiging van die bloubessiebedryf in Suid-Afrika.
Die uitvoer van bloubessies (waaronder bloubosbessies en bosbessies) het R655 269 810 in 2017 beloop. Dit is 73% van die totale uitvoer van bessies van R914 147 859.
Suid-Afrika voer die meeste van sy bloubessies (94%) na die EU en Brittanje uit. Suid-Afrika se belangrikste uitvoerbestemmings sluit Brittanje, Nederland, Ierland en Duitsland in.
GEVOLGTREKKING
Die bloubessiebedryf bied goeie beleggingsgeleenthede, maar boere wat daarin wil belê, moet hul huiswerk goed doen. Die ontwikkelingskoste, suksesvolle verbouing en bemarking van bloubessies is kapitaalintensief en riskant.
Maak dus seker jy het toegang tot die beste landboutegnologie en bemarkingsondersteuning en praat uit die staanspoor met jou finansiële vennote in jou boerdery.