Veilingsverslae

Daar is ’n goeie vraag na jong aanteelvee oor die hele land omdat die weidingstoestande in die algemeen gunstig is vir boere om hul kuddes weer op te bou ná die droogte. “

Nou is dié diere dus skaars,” sê mnr. Johan Scholtz, bestuurder van CMW se vee-en-veselafdeling in die noordelike streek.

Die maatskappy het veral in die noorde die afgelope jaar goeie groei in die lewendehawebedryf ervaar, wat wys die mark is weer lewendig.

Scholtz sê aangesien dit nou tradisioneel speentyd is, is voerkrale redelik vol en het die speenkalfprys ’n bietjie gedaal. Die weidingstoestande vir die winter lyk egter uitstekend danksy die goeie reën in die grootste deel van die somerreëngebied.

Omdat daar nou heelwat grondvog is, word uitgesien na ’n goeie lente. Die koue onderdruk ook parasietladings.

Scholtz moedig boere aan om veral in die winter hul diere teen brucellose te toets en in te ent, en om hul diere teen alle geslagsiektes in te ent om te verseker hulle sal op veilings verkoop kan word.

Terwyl die speenkalfpryse goed lyk, sal vrugbare bulle op die komende veilings goeie pryse behaal.

Hy sê met die huidige volgehoue en uitstekende wolprys behaal wolskape met goeie genetiese eienskappe besonder goeie pryse op veilings. — FREDALETTE UYS