30 JAAR GELEDE
Uit: Landbouweekblad, 8 en 29 Julie 1988
Die Landboukollege Elsenburg by Stellenbosch, die oudste landboukollege in Suid-Afrika, vier vanjaar sy negentigste verjaarsdag. Die kollege het in 1898 tot stand gekom toe ’n landbouskool op Stellenbosch na die plaas Elsenburg verskuif het sodat die studente praktiese werk kon opdoen. Die skool was aan die Victoria-kollege (nou die Universiteit Stellenbosch) verbonde. Elsenburg het sy naam gekry van sy eerste eienaar, Samuel Elsevier, wat die grond in 1698 van goewerneur Simon van der Stel ontvang het. Die plaas het daarna verskeie eienaars gehad. Ene Martin Melck het in latere jare verskeie verbeteringe op die plaas aangebring en in 1761 ook die indrukwekkende Kaaps-Hollandse huis (op die foto) gebou. Links voor is ’n ou slaweklok.
Lukas Fourie (regs voor) van Vryburg op sy perd Lucky het onlangs die vyftiende jaarlikse nasionale perde-uithourit by Fauresmith gewen. Fourie, ook die wenner in die standaardgewigafdeling, se wentyd was 8:27,6. Altesame 156 perde het vanjaar in die driedaagse rit oor 210 km weggespring, waarvan 94 dit voltooi het. Saam met Fourie op die foto is die wenners in die ander afdelings van die rit. Hulle is, agter van links, Tjaart de Wet (aangenaamste deelnemer) van Johannesburg, Nico Hayward (junior afdeling en die bes voorbereide perd in dié afdeling) van Vryburg en Robert Lord (swaargewigafdeling en die bes voorbereide perd in dié afdeling) van Middelburg (Kaap). Links voor is Oliver Ruhl (liggewigafdeling) van Magaliesburg.