DIENSPROGRAM VIR VEEARTSE KORT HEELTYDSE HOOF
KOMMER bestaan dat die program van verpligte diens vir veeartse omvergewerp kan word tensy ’n heeltydse koördineerder vir die program aangestel word.
Die bestuurder van die program het reeds maande gelede bedank en daar is ’n moratorium op die vul van poste by die Departement van Landbou, Bosbou en Visserye.
Die Rooivleisprodusente-organisasie (RPO) sê in sy jongste nuusbrief die departement beskou die verpligte gemeenskapsdiensjaar vir veeartse, wat pas hul studie voltooi het, as ’n suksesverhaal waardeur werksgeleenthede vir dié beroep geskep word.
Die bedanking van die bedie stuurder beteken egter ’n tekort aan hulpbronne vir dié program waarvoor die staat R100 miljoen beskikbaar gestel het.
INGRYPING
Dr. Clive Marwick, voorsitter van die Suid-Afrikaanse Veterinêre Raad (SAVR), het bevestig dat die koördineerder ’n paar maande gelede bedank het. Dr. Mphane Molefe het dié pligte oorgeneem. Molefe is waarnemende direkteur vir openbare dieregesondheid by die departement.
Marwick sê hoewel Molefe die koördinering goed doen, is dit nie reg dat hy nog met so ’n groot taak ook belas word nie, en ’n heeltydse koördineerder is nodig om die volgehoue sukses van die program te verseker.
Hy sê die raad sal in Augustus op sy vergadering met die departement dié kwessie opper.
Die staat is gedwing om verpligte gemeenskapsdiens van een jaar vir afgestudeerde veeartsenystudente in te stel weens ’n tekort aan veeartse in veral afgeleë landelike gebiede.
Die departement het nie op navrae oor die kwessie gereageer nie.
DERDE JAAR
Die departement het in Maart aangedui 150 gegradueerdes is in landelike gemeenskappe ontplooi. Dit is die derde jaar dat die verpligte gemeenskapsdiensjaar vir veeartse bestaan. Gegradueerdes word opgelei en deur staatsveeartse gementor. Wanneer hulle die diensjaar voltooi, kan hulle as ten volle geregistreerde, onafhanklike veeartse werk.