LEIERBOER SE OUERS AANGEVAL
“ONS sal hulle soek tot ons hulle kry. Daar was nog nie een plaasaanval in dié gebied waar ons nie die aanvallers gekry het nie.”
Só sê mnr. BP Greyling, ’n vooraanstaande boer van Wakkerstroom, oor die aanval op sy ouers, mnr. Kerneels Greyling (87) en sy vrou, Stienie (84).
Die egpaar en hul kleinseun mnr. Hans Greyling (21) is op Sondagaand 15 Julie op die plaas Bovenvallei in die distrik Wakkerstroom aangeval. Meer as twee verdagtes word tans deur die polisie en lede van die plaaslike veiligheidstelsel gesoek.
Al drie is ongedeerd. “Hulle is oukei, maar hulle is getraumatiseer. Hulle het nog altyd in vrede met almal gelewe,” sê BP. “My pa maak darem al weer grappe.”
BP, wat in 2011 Landbouskrywers se Boer van die Jaar was, sê in die afgelope 30 jaar het sewe plaasaanvalle in die omgewing voorgekom, waartydens vier moorde gepleeg is.
SPOOR GEVOLG
Die rowers, vermom met klapmusse, het die aand met vuurwapens by hul huis ingestorm, die egpaar en Hans vasgebind, en is kort daarna weg met al die vuurwapens, ammunisie, kontant en juweliersware wat hulle in die hande kon kry.
’n Buurman het BP van die aanval verwittig en hy is inderhaas daarheen om hulp te verleen. Mnr. Curt Paul, ’n boer van Panbult in Mpumalanga, het kort daarna twee verdagtes net 35 km van Bovenvallei in ’n Toyota Fortuner by Driefontein tussen Wakkerstroom en Dirkiesdorp van die pad laat aftrek. Die insittendes het egter te voet gevlug.
Hy het alarm gemaak en die polisie het die spoor met ’n snuffelhond gevolg. ’n Pistool en ’n pakkie ammunisie is daar naby opgespoor, maar daar was geen teken van die verdagtes en hul ander buit nie.