Vakbonde kry opleiding in Skandinawiese veldtog

’N REEKS werksessies om verteenwoordigers van die vernaamste vakbonde in die landbou, onder meer die Food and Allied Workers’ Union (Fawu), die Agricultural, Food, Fishing and Retail Industry Workers Union (Afriwu) en die United Workers Front, op te lei, het op 13 Julie op Wellington in die Wes-Kaap begin.

Die sessies is op versoek van die Skandinawiese wyn-monopolie begin. Dit is daarop gemik om vakbondleiers te help om die aard en vereistes van moniteringstelsels, asook die voordeel wat plaaswerkers uit sulke stelsels kan kry, beter te help verstaan, sê me. Marthane Swart van die konsultante-agentskap Kruger, Swart en Vennote.

Sy lei die werksessies saam met mnr. Mzukisi Mooi van die sentrum vir landelike regstudies.

“Die sessies is ’n bewusmakingsveldtog, asook om dialoog met Suid-Afrikaanse vakbonde moontlik te maak. Ons wil ver- seker dat vakbonde (leiers en verteenwoordigers) opbouend deelneem aan die proses om maatskaplike standaarde en sertifisering- en moniteringstelsels by die verantwoordelikhede van landbou-ondernemings in te sluit,” sê Swart.

VIND OPLOSSINGS

Die eerste werksessie het volgens Swart goed verloop. “Die deelnemers het op ’n samewerkende manier hulself toegespits om oplossings vir haakplekke in die bedryf te vind,” sê Swart.

Volgens me. Linda Lipparoni, hoof- uitvoerende direkteur van Wieta (die wynbedryf se vereni- ging vir etiese handel), sluit dié werksessies aan by die sessies wat deur Wieta, die Britse Stronger Together-inisiatief en ander organisasies reeds aan produsente aangebied word. Dit sal in die afsienbare toekoms voortduur.

Lipparoni is versigtig optimisties oor die benadering om vakbonde te betrek en meen dat dit ’n opbouende bydrae tot die bedryf kan lewer. “Indien die inligting wat oorgedra is, reg binne die vakbonde aangewend word en gebruik word om wel die beoogde oplossing-gedrewe dialoogplatform te stig, is dit ’n goeie stap,” sê Lipparoni.