Kies korrekte voer vir wild
Diere in die natuur vreet dit waaraan hulle oor millennia heen gewoond geraak het om hul voortbestaan te verseker. Wanneer jy met wild boer, is dit belangrik om hul natuurlike keuses na te boots.
Herbivore in die natuur kies kos wat hul voedingsbehoeftes vir instandhouding, groei, dragtigheid, melkproduksie en algemene gesondheid ondersteun. Dié kos is gewoonlik gras, die blare van struike en bome (takvoer) en vrugte wat natuurlik in ’n gegewe omgewing voorkom.
Sekere diere, soos witrenosters, verkies slegs gras. Kameelperde vreet weer die blare van bome, en ander diere, soos rooibokke en elande, verkies ’n kombinasie van gras en blare. Dan is daar ook diere, soos die blou- en rooiduiker, wat net vrugte verkies.
Vir optimale prestasie sal groter herbivoorspesies elke dag ’n vol pens moet hê. Die voedingstowwe wat nodig is vir onderhoud, groei, dragtigheid, melkproduksie en algemene gesondheid moet daagliks in die kos wees. Met ander woorde die korrekte kombinasie is nodig vir die spesifieke dier vir die bepaalde fisiologiese toestand waarin hy of sy in daardie stadium is.
Baie selfmengvoer wat op die plaas gemaak of van ’n meule gekoop word, bevat min of geen inligting oor die doel van die voer. Die boer moet dus vra of die voer self gemeng of gekoop is, ’n aanvulling is, ’n semi- ad lib-voer of ’n volvoer is en of dit geskik is vir die spesifieke spesie of groepe spesies in die kamp of op die plaas.
Indien aanvaar word dat die voer vir die regte spesie geformu- leer is, is dit belangrik dat diere nooit hul pense moet vol vreet met voer wat as ’n aanvulling ontwerp is nie. Voer wat as ’n volvoer ontwerp is, mag weer nooit in klein hoeveelhede gegee word nie.
SPESIFIEKE VOEDING
Wanneer diere gevoer word, is dit belangrik om hul pense daagliks vol te maak en in hul voedingsbehoeftes te voorsien (proteïene, energie, vitamiene, minerale en spoorminerale).
Die totale hoeveelheid voer wat ingeneem word of die vermoë van die spysverteringskanaal, kan in drie gelyke dele verdeel word (sien die ILLUSTRASIE ). Dus, die totale droë materiaal inname = 1 + 2 + 3 (sien die TABEL ).
Voedingswaarde vereistes vir die individuele dier of die kudde se voedingsbehoeftes( K V B) kan gesien word as die totale droë materiaal inname= totale KVB = 1 + 2 + 3.
Wanneer diere gevoer word, is dit belangrik dat die gemid- delde voedingswaarde behoefte van die kudde deur middel van aanvullings, semi- ad lib-voere of volvoere voorsien word.
Die afsonderlike dele (1, 2, 3) sal egter nie gelyk wees aan mekaar nie.
Aanvullende voere sal ’n hoër voedingswaarde konsentrasie hê vergeleke met semi- ad lib-voere, wat weer ’n hoër konsentrasie sal hê as volvoere.