Wat eet ons vanaand?
Of jy nou lus is vir ’n vinnige souttert, moeitelose maalvleisgebak of winterwarm kerrie of bredie — vandeesweek is daar ’n aandete vir elkeen se smaak.
Geurige maalvleisgebak
Ek maak soms hierdie resep en skep die vleismengsel in ’n oondbak wat met ’n paar lae gebotterde fillodeeg uitgevoer is. Dit lyk nie net mooi nie, maar die fillo gee ook ’n lekker tekstuur aan die maalvleisgereg.
60 ml olyfolie 1 ui, gekap 500 g beesmaalvleis 2 ml rooipeper 3 ml neutmuskaat 45 ml suurlemoensap Sout en swartpeper na smaak 60 ml gekapte, vars pietersielie 5 groot eiers 45 ml melk 2 wiele fetakaas, gekrummel
Voorverhit die oond tot 180 °C en smeer ’n middelslag-oondbak met olie.
Verhit 30 ml van die olie in ’n pan en braai die ui daarin tot sag. Voeg die maalvleis, rooipeper, neutmuskaat en suurlemoensap by en braai tot die vleis gaar is. Geur na smaak met sout en peper. Voeg die pietersielie by en kook vir nog ’n paar minute. Laat effens afkoel.
Klits die eiers en melk in ’n ander bak saam en roer by die vleismengsel. Sprinkel die gekrummelde fetakaas oor.
Gebruik ’n lepel om die kaas effens in die vleismengsel in te druk. Bak vir ongeveer 30 minute tot ferm en goudbruin. Sit voor met slaai van jou keuse. Lewer 6-8 porsies.
Penne met varkworsies, broccoli en bone
Vinnig, maklik en gelaai met geur. 1 pak (500 g) penne-pasta 8 gaar varkworsies, in stukkies gesny 15 ml olie 1 ui, grof gekap 2 knoffelhuisies, fyn gekap 300 g stukkies broccoli, gaar gestoom 1 blik (410 g) botterbone, gedreineer en afgespoel 250 ml room 2 eiergele Sout en vars gemaalde swartpeper na smaak 250 ml gerasperde Parmesaankaas
Smeer ’n oondbak liggies met olie. Kook die pasta in ’n groot pot vinnig kokende soutwater met ’n bietjie olie in tot gaar, maar steeds ferm. Terwyl die pasta kook, braai die stukkies varkworsies in ’n pan met olie tot goudbruin. Skep uit en hou eenkant. Braai die ui en knoffel in dieselfde pan tot sag en gaar. Voeg die broccoli en botterbone by en braai vir ’n paar minute. Klits die room en eiergele saam. Dreineer die gaar pasta en gooi dit terug in die kastrol. Voeg die varkworsies, broccolimengsel en die eier-en-roommengsel by en meng liggies deur. Geur liggies met sout en peper. Keer alles uit in die oondbak en sprinkel die Parmesaankaas oor. Bak vir ongeveer 20 minute tot die kaas goudbruin en die pastagereg deurwarm is. Lewer 6-8 porsies.
Oondgebakte hoenderkerrie
1 kg hoenderporsies Sout en vars gemaalde swartpeper na smaak 125 ml volvet-mayonnaise 125 ml blatjang 15 ml gladde appelkooskonfyt 15 ml sterk kerriepoeier 30 ml vars suurlemoensap Gekapte, vars pietersielie of koljanderblare en geroosterde klapper, om af te rond
Voorverhit die oond tot 180 °C. Pak die hoenderporsies in ’n enkellaag in ’n oondbak en geur met sout en swartpeper. Meng die res van die bestanddele, behalwe die pietersielie of koljanderblare, goed en giet oor die hoender. Bedek met foelie en bak vir 40 minute. Verwyder die foelie en bak oop vir nog 20-30 minute, tot die hoender goudbruin en die sous borrelend en lekker dik is. Sprinkel pietersielie of koljander en geroosterde klapper oor voor jy dit voorsit. Bedien