Mlengana-gemors: Zokwana was sy hande
DIE volstruisbedryf en die Departement van Landbou, Bosbou en Visserye is druk besig om weer die goedkeuring vir uitvoer van die Europese Unie (EU) te kry.
Nie vars óf bevrore volstruisvleis mag tans na die EU uitgevoer word nie, hoewel Suid-Afrika ’n nasionale plan vir die beheer van chemiese residu het. Die plan is onderhewig aan ’n jaarlikse goedkeuring deur die EU.
Tydens die laaste oudit deur die EU is erge tekortkominge in die toepassing van die beheerprogram gevind, wat die betroubaarheid van die residustatus onder verdenking gebring het.
Suid-Afrika is dus vanaf 1 Maart verwyder van die EU se lys van lande wat goedgekeurde planne het om residu te monitor. Dit het
meegebring dat Suid-Afrika nie meer volstruis-, krokodil- of wildsvleis na die EU kan uitvoer nie.
Dr. Mike Modisane, die departement se hoof van diereproduksie en -gesondheid, het in Februarie inderhaas na die EU gereis om die situasie te probeer beredder, maar sy pogings was onsuksesvol.
ALLES MOONTLIK
’n Verbod op die uitvoer van vars volstruisvleis is reeds sedert Junie verlede jaar van krag. Dit raak nie verwerkte produkte, soos vere en leer, nie.
Mnr. Piet Kleyn, uitvoerende hoof van die Suid-Afrikaanse Volstruis besigheid s kamer( SA VBK ), sê daar is geen twyfel nie dat die volstruisbedryf se winsgewendheid en volhoubaarheid onder druk is en dat alles moontlik gedoen word om Suid-Afrika terug te kry op die lys van lande met goedkeuring vir uitvoer na die EU.
“Indien volstruisvleis nie uitgevoer kan word nie, is daar nie voldoende winsgewendheid vir die betrokkenes in die bedryf nie. Ons spook hard saam met die departement sodat Suid-Afrika weer op die lys kan kom,” sê Kleyn.