Dié week in die landbou
MEESTERKLAS
Henko Vermeulen (links) en Anwill Ryk leer skeer onder die waaksame oog van mnr. Themba Khoza, die Protea-skeerder. Agt leerders van die Landbougimnasium Augsburg op Clanwilliam het die afgelope skoolvakansie internasionaal geakkrediteerde sertifikate in skaapskeer tydens dié skool se kursus verwerf. Die kursus is aangebied met die samewerking van die Nasionale Wolkwekersvereniging en die Wes-Kaapse departement van landbou. Cobus (Oros) Nieuwoudt was die junior skaapskeermeester. Kaylie de Jager was die eerste Wes-Kaapse skoliere-skaapskeerder wat ’n bronsmedalje kon verower. Om daarvoor in aanmerking te kom, moet ’n mens vyf skape binne ’n halfuur kan skeer met ’n minimum raakskeerplekke en dubbelknipsels.
ROBOT-MEEVALLER
Die Kaapse tegnologiemaatskappy Aerobotics het $2 miljoen (sowat R26,5 miljoen) se ontwikkelingsgeld bekom om sy produk, wat help met plaag- en siektebestryding by boomgewasse, uit te brei en te bemark. Die maatskappy se produk Aeroview gebruik masjienleer en kunsmatige intelligensie om satellieten hommeltuigbeelde te verwerk om boere te help om besluite te neem. Onder die borge is Ned- bank en die beleggingsmaatskappy 4D1 Capital, asook twee Amerikaanse beleggers, AgFunder en AngelList. Die maatskappy sê banke en versekeraars vind ook sy inligting nuttig wanneer hulle ’n kliënt se risiko bepaal. Die maatskappy gaan die geld gebruik om na die buiteland uit te brei. Hy wil in Augustus in Amerika vastrapplek vind.
WAPENSAAK WAG
’n Hofaansoek gemik daarop om die verwarring in die vuurwapeneienaarsgemeenskap uit die weg te ruim, is met ’n week uitgestel ná dit op 17 Julie voor die Noord-Gautengse hooggeregshof gedien het. Die vuurwapen-drukgroep Vuurwapeneienaars Suid-Afrika (Gosa) vra dat die SA Polisiediens die insameling van vuurwapens waarvan die lisensies verval het, opskort totdat ’n aansoek aangehoor word dat vervaldatums van vuurwapenlisensies afgeskaf word. Die groep meen dat die nasionale polisiekommissaris, as die registrateur van vuurwapens, die diskresie het om só ’n besluit te neem en dat dit die polisie miljoene rande sal bespaar.
BAKTERIE-KOSTE
Die genoteerde kosprodusent en -verwerker Greenyard reken die wêreldwye herroeping van produkte wat hy weens listeriose-besmetting by ’n Hongaarse fabriek moes doen, gaan hom rondom ¤30 miljoen (sowat R464 miljoen) kos. Die maatskappy sê in ’n verklaring dié bedrag sluit die geraamde koste vir produkte, vervoer, hantering, vernietiging, subkontrakteurs en verlore marges in. Die kleinhandelgroep Woolworths het onlangs aangekondig dat hy ’n rys-en-groenteproduk aan die plaaslike mark onttrek weens dié besmetting. Produkte wat vanaf 13 Augustus 2016 tot 20 Junie vanjaar vervaardig is, word geraak.
CHEMIESE REAKSIE
Die Mededingingstribunaal het voorwaardelik goedgekeur dat die Duitse landbouchemiese maatskappy BASF die bates van Bayer koop wat laasgenoemde moes verkoop om toestemming te kry vir die samesmelting met Monsanto. Bayer moes ontslae raak van sy wêreldwye Liberty en LibertyLink-tegnologie. Die tribunaal sê in ’n verklaring daar is van BASF verwag om die tegnologie self te kommersialiseer óf om dit aan ’n derde party te lisensieer vir kommersialisering. Dit is sodat Suid-Afrika baat vind by Bayer se afstanddoening van die tegnologie.
KROONJUWEEL
Die vrugteprodusent Capespan gaan voortaan sy sagtesitrus-aanbod onder ’n nuwe vaandel bemark om bekende handelsmerke, soos Cutie en Halo, die stryd aan te sê. Dit kom te midde van groeiende sagtesitrus-volumes en handelsmerke wêreldwyd. Die nuwe handelsnaam, Outspan Gems, sal eksklusief vir sagtesitrus (veral clementine, mandaryne en laat mandaryne) gebruik word wat Capespan in Suid-Afrika en die res van die wêreld produseer, verkry en bemark. Die Outspan-handelsmerk het in 1936 ontstaan. Me. Adéle Ackermann, Capespan se groepshandelsmerkbestuurder, sê Suid-Afrika se sagtesitrus-aanbod sal na verwagting oor die volgende vyf jaar verdubbel.