60 JAAR GELEDE
Uit: Landbouweekblad, 19 Augustus 1958
CLARENS SE KALKOEN-VROU
Dit is vroue, nie mans nie, wat aan Bethlehem die naam besorg het van die voorste kalkoenteeltdistrik in die Vrystaat. Daarmee is die OosVrystaat geïdentifiseer as ’n streek wat by uitnemendheid vir die ontwikkeling van die kalkoenteeltbedryf in SuidAfrika geskik is.
Onder die voorste vrouens wat dié bedryf hier op die voorgrond gebring het, is mev. H. van Schalkwyk, ’n vrou met ’n “hand” vir kalkoene. Ná jare lange ondervinding weet sy alles van kalkoene en kalkoenboerdery. In haar pogings om kalkoenteelt te bevorder, het sy al ’n paar keer eiers regstreeks uit die buiteland ingevoer en dit hier laat uitbroei. Sy boer met Amerikaanse breëborskalkoene, ingevoerde Jersey Buffs en die klein Wit Beltsvilles.
Sy laat eiers verkieslik onder kalkoenwyfies broei, maar wanneer sy ’n kalkoen eiers gegee het, sit sy terselfdertyd eiers in ’n broeimasjien. Die kalkoenkuikentjies onder die wyfie en dié in die broeimasjien is dan van dieselfde ouderdom. Sy plaas soms tot ’n paar honderd van die masjienkalkoentjies by die wyfie sodat sy bedags vir hulle kan sorg. Saans word net genoeg by die wyfie gelaat as wat sy vir die nag kan versorg en die res word na die kunsmoeders geneem.
Op dié wyse kry ál die kuikens beurtelings ’n geleentheid om onder die wyfie te slaap en word ’n groot trop van ’n paar honderd deur een wyfie grootgemaak.