OOS-KAAPSE SKOOL TEEL NOU DOHNE-MERINO’S
DIE Dohne-Merino-telersgenootskap het nagenoeg 150 kommersiële Dohne-Merino-ooie aan die Hoër Landbouskool Marlow by Cradock geskenk.
“Dit is ’n groot gebaar van die telersgenootskap en gee die leerders groter blootstelling wat meer skaaprasse betref,” sê mnr. Charles Jordaan, voorsitter van die skool se beheerliggaam.
“Ons is baie dankbaar, veral teenoor die telers. Hulle het vir ons baie mooi skape gestuur,” sê Jordaan. Hy sê die skenkings kom van telers van oor Suid-Afrika heen en die mikpunt is om uiteindelik ’n kudde van 300 kommersiële ooie te hê.
Danksy dié skenking sal leerders nou ook opleiding in wolklassering en rasstandaarde kry. Die skool sal ook ’n inkomste uit die kudde kan invorder.
Wat blootstelling betref, verduidelik Jordaan, sal leerders nou in die praktyk kan sien hoe die wol en die karkasgroottes tussen ’n Dohne-Merino-lam en ’n Merinolam byvoorbeeld met mekaar vergelyk.
KUDDEBESTUUR
Die skool het reeds ’n Merino- en Angorakudde, en sal alleen vir die volle bestuur van die kudde verantwoordelik wees.
Volgens mnr. Philippie Marais, ondervoorsitter van die Dohne-Merino-telersgenootskap, wat die skenking help reël het, is dit ’n groot promosiegeleentheid vir die genootskap, want die skool se leerders is toekomstige boere en agente. Die genootskap se hoofbestuurder sal ook jaarliks ’n volledige Dohne-Merinokursus vir die leerders by die skool aanbied.
Die genootskap het ’n jaar gelede ’n soortgelyke skenking aan Hoërskool Weston, ’n landbouskool in KwaZulu-Natal, gemaak, wat tans baie goed vorder.