LANGKLOOF-BOER VEREER VIR ENTREPRENEURSVERNUF
MNR. RIAAN STRYDOM (foto) van die Bokmakierie-boerderytrust van Joubertina is as die Oos-Kaapse Jongboer van die Jaar vir 2018 aangewys. Dié aankondiging is op Agri OosKaap se kongres gemaak.
Strydom boer saam met sy broer, Mario, in die Langkloof met appels, pere, hoenders en varke.
Volgens Strydom kan hy sy sukses daaraan toeskryf dat hy in die hele waardeketting betrokke is. “Ons is by die hele vleiswaardeketting betrokke. Ons boer, slag, verwerk, bemark en versprei.”
Hy sê omdat hy sy eie slagplaas, slaghuis en vragmotors bestuur, kan hy sy koste verminder en sy wins verhoog.
Sedert Strydom ongeveer 16 jaar gelede op die familie se vrugteplaas begin boer het, het hy die appel- en peerproduksie
op die plaas met 300% laat toeneem op ’n kleiner aangeplante gebied.
Die hoenderafdeling het dermate gegroei dat hy sy hoenderprodukte aan verskeie handelaars en groothandelaars in die Oos- en Wes-Kaap kan verskaf.
Die plaas se kantoor is in die Krakeelrivier-omgewing naby Joubertina. Die boerdery verskaf werk aan sowat 160 heeltydse werkers en 40 seisoenswerkers. Hy verskaf bykomende werk aan die seisoenswerkers deur hulle uitheemse bome, soos swartwattel, te laat uitkap. Hy verkoop die hout as vuurmaakhout in die Wes-Kaap.