RPO MIK VIR HOËR HEFFING
DIE rooivleisbedryf sal op hoofsaaklik twee fronte vir sy volhoubare voortbestaan moet veg, sê mnr. Koos van der Ryst, voorsitter van die Rooivleisprodusente-organisasie (RPO). Die bedryf se grootste bedreiging is dieregesondheid. Terselfdertyd sal die hele waardeketting meer moeite moet doen met verbruikersopvoeding.
Van der Ryst het op die onlangse kongres van Limpopo se RPO op Modimolle gevra dat die provinsie se lede aan die nasionale organisasie ’n mandaat moet gee om aansoek te doen om ’n hoër statutêre heffing en om ’n nuwe strategiese plan vir die RPO uit te voer.
Daardeur, meen hy en die RPO se bestuur, kan die organisasie homself posisioneer om die probleme wat die bedryf ervaar, die hoof te bied. “Ons het geld nodig om ’n verskil te maak,” sê Van der Ryst.
Uit die huidige statutêre heffing het die bedryf R42 miljoen tot R44 miljoen per jaar beskikbaar, maar Van der Ryst sê ’n verhoging in die heffing gaan nodig wees as die RPO sy nuwe strategiese plan wil uitvoer.
DOEN DIT SELF
Hy sê daar is in die huidige begroting byvoorbeeld R8 miljoen beskikbaar vir verbruikersopvoeding. “Dit klink baie, maar as ’n mens met so ’n veldtog begin, besef jy dis eintlik niks.”
Daar moet ook navorsing gedoen word oor produksiestelsels, en die bedryf sal vir sy eie voorligting moet sorg. “Dit help nie ons baklei met die staat oor kwessies soos dié nie. Dit bring ons niks in die sak nie. Ons beste opsie is om dit wat ons in ons bedryf wil sien, self daar te stel.”
Van der Ryst sê dieregesondheid is ’n tydbom. Dít is waar die bedryf die hardste sal moet werk om ’n ramp af te weer. Hy het boere aangemoedig om vergaderings van hul provinsiale dieregesondheidsforum by te woon en spesifieke bekommernisse en probleme daar te lug.
“Daardie kwessies word dan op die nasionale forum onder die voorsitterskap van dr. Pieter Vervoort bespreek.”
NEEM BEHEER
Mnr. Gerhard Schutte, nasionale bestuurder van die RPO, voeg by dat sulke vennootskappe ’n groot deel van die RPO se nuwe strategie vorm. Hy stem saam met Van der Ryst dat die oplossing tot die bedryf se probleme nie daarin lê om die Regering voortdurend hof toe te sleep nie, maar eerder deur beheer te neem van die situasie en saam oplossings te kry.
Die RPO hoop om deur ’n verhoging in die statutêre heffing R70 miljoen tot R80 miljoen per jaar in te vorder. Van der Ryst wys daarop dat dit maar ’n klein persentasie in ’n bedryf met ’n omset van R89 miljard is.