Boere kan nog drie jaar lank kuddes herbou
DIE vooruitsigte vir die beesvleis-, skaapvleis-, wol- en katoenbedryf lyk goed vir vanjaar en aanstaande jaar. Die aanbod van beesvleis is kleiner en die vraag hoog.
Só het mnr. Wessel Lemmer, senior landbou-ekonoom van Absa Agribesigheid, op die bekendstelling van die bank se lentevooruitskouing gesê.
Boere is besig om hul kuddes te herbou en produksie sal na verwagting die volgende drie jaar laer bly.
Beesvleispryse behoort gunstig te bly. Slagsyfers was in die eerste vyf maande van vanjaar 6% laer as verlede jaar en 13%
laer as twee jaar gelede.
“Namibiese uitvoer van lewende hawe en speenkalwers het tot vorige vlakke herstel en vul die tekort aan speenkalwers in Suid-Afrika aan,” het Lemmer gesê.
Ook in die skaapvleisbedryf is produksie vanweë die heropbou van kuddes kleiner. Produksie sal na verwagting aanstaande jaar herstel, wat pryse sal beïnvloed. Roofdiere en wisselvallige pryse verhoog risiko’s vir boere en voerkrale.
Lemmer het gesê die bedryf sal na verwagting bly baat vind by hoë vleis- en wolpryse, met laasgenoemde wat gunstig deur hoë internasionale pryse beïn-
vloed word.
Die internasionale vraag na wol is sterk. In China, die grootste invoerder van Suid-Afrikaanse wol, dra die groeiende middelklas daartoe by.
GROEI
Verder is die verbruikersneiging om van sintetiese na natuurlike vesels oor te skakel ’n belangrike faktor.
Lemmer het gesê die aanbod sal na verwagting knap bly en pryse dus ondersteun. Die plaaslike bedryf kan met tot 50% groei sonder dat dit pryse beduidend sal benadeel.
“Boere word aangemoedig om die geleentheid te gebruik om produktiwiteit te verhoog,” het hy gesê.
Ook in die katoenbedryf is daar ruimte vir die uitbreiding van produksie. “Die sterk globale verskuiwing in verbruikersvraag na natuurlike vesels sal groei in die bedryf ondersteun.”
Suid-Afrika se pluisvermoë is 162 000 ton, terwyl 102 158 ton geoes word. Lemmer het gesê na verwagting sal die vermoë teen 2021 produksie beperk, maar daar word ook verwag dat die vermoë binne vier jaar met ’n bykomende 58 000 ton uitgebrei gaan word.
“Katoenproduksie gaan na verwagting bly groei danksy beter winsgewendheid vergeleke met mielies en sonneblomme.”
Bedrywe waar kwessies soos goedkoop invoer en biosekerheidsvereistes weens siektes na verwagting gaan voortduur, sluit suiwel, suiker, hoendervleis en varkvleis in.
’Namibiese uitvoer van lewende hawe en speenkalwers het tot vorige vlakke herstel en vul die tekort aan speenkalwers in SuidAfrika aan.’