GEEN VERLIGTING IN SIG VIR DROË OOS-KAAP
DIE vooruitsigte op reën vir die droë westelike deel van die OosKaap vir die res van die jaar lyk maar skraal.
Mnr. Hugh van Niekerk, Oos-Kaapse streeksbestuurder van die Suid-Afrikaanse Weerdiens, sê die droogtetoestande in sekere streke in die provinsie sal vir die volgende paar maande voortduur. Die droogte kan van September af oor die Nelson Mandelabaai-streek vererger. Daarby word warm dagtemperature vir die res van die jaar – veral van September af – voorspel, wat verdamping gaan verhoog.
Volgens die seisoenale vooruitskatting van Augustus tot Desember vir die Oos-Kaap, kan ’n El Niño-stelsel van die lente af oor die provinsie voorkom. “Hoewel dit nog te vroeg is om die moontlike impak te voorspel, gaan die verskynsel gewoonlik gepaard met droër en warmer toestande in die somerreëngebiede,” sê hy.
Verlede naweek het sowat 5 mm reën by Patensie, 10 mm by die Addo-olifantpark, 35 mm by Kaap St. Francis, 18 mm by Koega, 12 mm in Port Elizabeth, 8 mm in die Tsitsikamma en 11 mm in Uitenhage geval.
DROOG
Klimaatmodelle voorspel vir Augustus bogemiddelde reënval vir die distriksmunisipaliteit Sarah Baartman en die munisipaliteit Nelson Mandelabaai, met die res van die provinsie wat ondergemiddelde reënval kan verwag.
Van September tot November word ondergemiddelde reën oor die hele provinsie voorspel. Na verwagting sal droogtetoestande in die weste van die provinsie voortduur, asook in dele van die Alfred Nzo-streek in die noorde.
Van Oktober tot Desember word droër toestande in die grootste deel van die streek verwag, met bogemiddelde reënval in die verre ooste van die Joe Gqabi-streek, die Alfred Nzo-streek en dele van die munisipale distrik OR Tambo.
SKENKINGS
Mnr. Doug Stern, voorsitter van
Agri Oos-Kaap, het op die organisasie se jaarkongres gesê dit is kommerwekkend dat hy reeds die derde agtereenvolgende jaar oor die droogte in die provinsie moet verslag doen. “Ongelukkig het die situasie eintlik vererger, veral in die westelike gebiede.”
Hy het gesê ondanks vele pogings kon Agri Oos-Kaap nog nie enige hulp van die provinsiale regering verkry nie. Alle droogtehulp tot dusver was danksy die samewerking en bystand van boere in KwaZulu-Natal, Mpumalanga en die Vrystaat. Hy het ook Kwanalu en Gift of the Givers bedank vir hul bystand.
Hy sê hoewel dit moeilik is om akkurate getalle te gee, is tot dusver vanjaar ongeveer 22 000 ton voer in die westelike dele van die provinsie afgelewer teen ’n totale koste van ongeveer R40 miljoen.
Hy het bygevoeg dat die situasie in die Gamtoosvallei ook kommer wek met die Kouga-dam wat op 30 Julie net 6,95% vol was.
Die plaaslike munisipaliteit Kouga het aangekondig dat water van 6 Augustus af slegs vir ’n paar uur per dag in Patensie en Hankey se krane beskikbaar sal wees in ’n poging om water te bespaar.