NAVORSING BEKYK KLIMAATSVERANDERING
WATERGEBRUIK en insekplae het saam die grootste hap van Aartappels SA (ASA) se navorsingsbegroting vir vanjaar in beslag geneem.
Op die organisasie se onlangse navorsingsimposium op Parys het navorsers gesê watergebruik het net meer as 14% van die navorsingsbegroting opgeneem, teenoor 8% verlede jaar. Navorsing oor insekplae het gestyg van 6% in 2017 tot 12% in 2018.
Die grootste item op die navorsingsbegroting was die oordrag van kennis, wat 15% van die finansiering benut het.
Dr. Fienie Niederwieser, bestuurder van navorsing en ontwikkeling by ASA, sê die feit dat die simposium vanjaar, nes verlede jaar, 208 mense gelok het (al is verlede jaar se simposium op Langebaan aan die Weskus gehou), wys dat bedryfslede die inligting wat daar oorgedra word, belangriker ag as waar die simposium aangebied word.
NUWE VRAE
Niederwieser sê van die belangrike nuwe vrae wat die bedryf se navorsers ondersoek, is of die temperatuurriglyne wat in huidige groeimodelle gebruik word, steeds realisties is.
“Uit die werkgroep-proewe is dit duidelik dat goeie opbrengste steeds behaal word met betrekking tot die groeimodelle se potensiële opbrengste. En dít ten spyte daarvan dat werklike temperature hoër is as wat oor die algemeen (en in groeimodelle) as die optimale temperatuur vir aartappels aanvaar word.
“Die feit dat navorsers hierdie vrae vra, beteken dat ons noukeuriger na spesifieke produksietoestande begin kyk en dus ons navorsingsresultate ál meer nommerpas vir plaaslike produsente kan formuleer,” sê sy.
Die organisasie ondersoek tans ook die aanname dat die verspreiding van die aartappelblaarmyner slegs deur vlieënde insekte geskied wat op omliggende gasheerplante oorleef.
“Dit is ’n belangrike ekonomiese vraag wat gevra word, en die antwoord daarop sal die verspreiding en dus ekonomiese impak van die blaarmyner moontlik kan beperk,” sê Niederweiser.
Die doel van die simposium is om boere en veral verskaffers van produksiemiddele, agente en konsultante van die nuutste inligting in die aartappelbedryf te verwittig.
Volgende jaar se ASA-navorsingsimposium word weer in die laaste week van Julie aangebied.