‘TEGNOLOGIE KAN NUWE LEWE IN VEEBEDRYF BLAAS’

VIR veeboerdery is vrugbaarheid die grondslag vir winsgewendheid en op dié gebied kan Suid-Afrika se veebedryf ongekend verbeter mits reproduksietegnieke moderniseer.

Dít is waarop vanjaar se Veeskool, wat van 17 tot 19 Oktober naby Ventersburg gehou word, klem sal lê.

“Suider-Afrika is so te sê op ’n ekstensiewe eiland geleë wat vleisproduksie betref,” sê mnr. Kobus Bester, voorsitter van die Lewendehawe Registrerende Federasie (LRF), wat die geleentheid met die samewerking van Breedplan en Landbouweekblad aanbied.

“Kunsmatige inseminasie (KI) is tot ons beskikking om meerderwaardige diere te teel, maar relatief min boere gebruik dit; seker minder as 1%. ’n Enkele bul kan hoogstens 30 tot 40 koeie per dektyd dek, terwyl derduisende koeie met behulp van KI dragtig gemaak kan word.”

Die oogmerk is om boere as ’t ware wakker te skud sodat hulle deeglik onder die besef van die gevolge van swak reproduksie aan die een kant en die belangrikheid van goeie reproduksie aan die ander kant kan kom. “Ons gaan nuwe lewe in die veebedryf blaas sover dit die aanwending van die nuutste reproduksiemetodes betref,” sê Bester.

DRIE FAKTORE

Bester, me. Izaan du Plooy van Breedplan SA en dr. Michael Bradfield, direkteur van die LRF, meen veels te min moderne reproduksietegnieke word tans in die vleisbees- en kleinveebedrywe toegepas.

Die Veeskool wil op drie faktore klem lê deur veeboere anders te laat dink oor “ou” tegnologie, soos KI, hulle in te lig oor reproduksiemaatstawwe en inligting oor die nuutste tegnieke te verskaf.

Selfs nuwe tegnologie, soos geslagsbepaling van semen, word reeds algemeen in ander lande gebruik. Daarom betrek die LRF drie van die leiers op die gebied van KI, konvensionele embriospoeling en -oorplasings en in vitro-produksie van embrio’s (IVEP) by die Veeskool. Hulle is dr. Morné de la Rey, mededirekteur van Embrio Plus op Brits, dr. Fanie Steyn, besturende direkteur van embriospoelings en laparoskopie-programme van Ramsem in Bloemfontein, en dr. Neil van Zyl, direkteur van In Vitro Africa op Parys.

Op die gala-aand op 18 Oktober word eerbewyse aan Suider-Afrika se voorste veeboere oorhandig; aan die Teler van die Jaar, die Bul van die Jaar op skoue, die Prestasiegetoetste Bul van die Jaar, die Beste Nuwe Toetreder tot die Kommersiële Beesbedryf en die Beste Koeigroep van die Jaar.

‘ ’n Enkele bul kan hoogstens 30 tot 40 koeie per dektyd dek.’