HEFFING OP EIERS INGESTEL
DIE PLAASLIKE eierorganisasie se finansiële gesondheid gaan voortaan deur ’n statutêre heffing op tafeleiers ondersteun word. Mnr. Senzeni Zokwana, Minister van Landbou, Bosbou en Visserye, het die instel van dié nuwe heffing einde Julie in die Staatskoerant afgekondig.
Dr. Charlotte Nkuna, voormalige waarnemende uitvoerende hoof van die Suid-Afrikaanse Pluimveevereniging (SAPV), het ’n paar maande gelede in die bedryfspublikasie Pluimveebulletin geskryf die heffing is noodsaaklik vir die voortgesette bestaan van die eierorganisasie.
Volgens haar was die organisasie se ledetal bestendig, maar vrywillige ledebydraes het nie vir genoeg inkomste gesorg nie.
Luidens die Staatskoerant sal die heffing van R0,015 per dosyn eiers (BTW uitgesluit) dadelik in werking tree en, met jaarlikse verhogings, tot Maart 2022 geldig bly.
Verkopers van tafeleiers aan die handel moet dit betaal.
Die eierorganisasie sal sowat 70% van die geld vir verbruikerskommunikasie en -opvoeding, navorsing, bedryfskakeling en produksie-ontwikkeling gebruik.
Minstens 20% sal aan transformasie bestee word en hoogstens 10% aan administrasie.
Die SAPV sal die administrateur van die heffing wees en sal ’n derde party aanstel om met die invordering daarvan te help.
Zokwana het ook afgekondig dat verkopers van tafeleiers by die SAPV moet registreer en inligting aan die SAPV moet verskaf. Die inligting moet luidens die Staatskoerant verseker dat deurlopende, tydige en akkurate inligting oor verkope van tafeleiers aan die handel beskikbaar is. Dit sal help met ingeligte besluite en behoort die doeltreffendheid, bemarking en die volhoubaarheid van die bedryf te bevorder.