Groei saam met jongste tegnologie
Die koms van die vierde industriële revolusie bring geleenthede om voedselproduksie wêreldwyd te herskep en produsente in staat te stel om teen 2050 in die kosbehoeftes van 9 miljard mense te voorsien.
Landbouenkosproduksie is die volgende groot geleentheid vir ontwrigting. Dit sal verbruikers, boere, beleggers én innoveerders bevoordeel. Die finansieringsbedryf is een van die bedrywe wat die vatbaarste is vir ontwrigting deur sagteware omdat finansiering uit inligting bestaan – en nie konkrete goedere nie.
Die gebruik van slimfone vir aanlyn banksake, beleggingsdienste en kriptovaluta is voorbeelde van tegnologie met die doel om finansiële dienste toegankliker te maak.
VOEDSELVRAAG TEEN 2030 RADIKAAL ANDERS
Sekere tendense soos verlaagde vleisverbruik, toename in naspeurbaarheid en veranderde verbruikersvoorkeure gaan die vraag na voedselprodukte wesenlik beïnvloed. Verbruikers se
vleisinname kan na verwagting met tot 15% daal, wat beteken produsente gaan alternatiewe proteïenbronne produseer. Die vraag na vleis gaan wêreldwyd teen 2030 met 60 miljoen ton daal.
Water wat voorheen vir die produksie van lewende hawe en voergewasse toegedeel is, gaan vir ander produksiedoeleindes beskikbaar gestel word. Die verbruiker gaan skanderingstegnologie op sy slimfoon gebruik en sal onmiddellik kan vasstel wat die samestelling, gehalte en veiligheid van die voedsel op sy bord is, asook wanneer en waar dit geproduseer is. Van 30% tot 50% van jou klante wat jou voedsel of produkte plaaslik of oorsee gebruik, sal toegang tot hierdie tegnologie hê.
Voedselbedrog sal in ’n groot mate uitgeskakel word. Heuning is een van die voedselsoorte wat die meeste hierby baat vind omdat die verbruiker onmiddellik inligting het oor die samestelling en oorsprong daarvan.
Voorts gaan tegnologie meer stabiliteit in produksie en pryse meebring, en danksy regstreekse kommunikasie tussen produsent en verbruiker gaan kleiner surplusse geproduseer word.
BETER SKAKELS IN DIE WAARDEKETTING
Altesaam 90% van die boere in ontwikkelende lande gaan slimfone en toepassings op hul fone hê. Dit is gelykstaande aan 350 miljoen boere wat toegang tot inligting het om hul produksiestelsels te verbeter en die verbruiker te bereik. Boere se inkomste uit landbouproduksie sal toeneem omdat dit makliker sal wees om deur nuwe betaalstelsels vir produkte betaal te word.
Voordelige versekering. Nagenoeg 75% van kommersiële kleinboere wêreldwyd (300 miljoen boere) wat voorheen nie toegang tot oesversekering gehad het nie, sal groter toegang kry. Gevolglik sal die sektor se inkomste aansienlik kan toeneem en opbrengste verhoog. Danksy dié versekering sal die boer meer gelykmatige inkomstestrome verwesenlik en dus inkomsterisiko beperk. Gevolglik is die boere meer gewillig om groter risisko’s te waag, uit te brei en te diversifiseer.
Groter naspeurbaarheid. Van alle voorsieningskettings in ontwikkelende lande sal 75% deur
die internet van dinge (IoT) beheer word en uiteindelik voedselverlies beperk. Tegnologie wat onder meer temperatuur en humiditeit gedurende die vervoer van produkte reguleer, sal meer produsente in staat stel om die struikelblokke wat vervoer bied, te oorkom. Sodoende word nie net ’n langer raklewe verseker nie, maar dit help ook dat produkte voor akkurate vervaldatums op die verbruiker se tafel is. Blokketting benut vir voedselveiligheid. Die landbou-aanbod van die helfte van alle waardekettings wêreldwyd sal (teen 2030) deur blokketting nagespoor word. Voedselverliese van miljoene ton gaan hierdeur voorkom word. Die tegnologie verhoog dus die doeltreffendheid van die waardeketting waardeur produkte bemark word. Maak dus seker jy is deel van die mededingendste waardeketting wat oor die regte tegnologie beskik. Voedselveiligheid verhoog, die vraag- en aanbodseine wat prys bepaal, verbeter en dit help om die produksie van oorskotte en tekorte te voorkom of beter te bestuur. Uiteindelik sal daar groter sekerheid oor voedselpryse wees.
DOELTREFFENDE PRODUKSIESTELSELS
Voordele van presisieboerdery. Teen 2030 sal 25% van alle boerderye wêreldwyd presisieboerdery as praktyk aanvaar het. Produsente sal produksiemiddele en werktuie beter gebruik, produksiekoste sal verder daal en opbrengste verhoog, terwyl die verbruik van water vir besproeiing nóg doeltreffender is.
Geenredigering. Altesame 15% van boerderye wêreldwyd sal teen 2030 mikrobioomtegnologie gebruik om gewasveerkragtigheid te verhoog. Maatskappye sal die organismes identifiseer wat voordelig is vir produksie. Dit beloof om produksie te verhoog en kunsmiskoste te verlaag.
In die verlede is plantverbetering op drie maniere meegebring, naamlik oop bestuiwing, kruising en genetiese modifikasie. Daar is nou ’n vierde metode: geenredigering. Droogtebestande gewasse kan byvoorbeeld só ontwikkel word waar gene van droogte-, plaag- en siekteverdraagsame plante en voedsamer plantgene in gewasse ingebou kan word.
Waterslim. Altesaam 75% van alle boerderye wat vanjaar nie aan alternatiewe kragnetwerke gekoppel was nie, sal teen 2030 toegang daartoe hê. Dié boere het dan toegang tot verkoelingsgeriewe en kan beter pryse vir hul produkte behaal en raklewe verbeter. Dit gaan groter besproeiingsdoeltreffendheid meebring, met beter skeduleringspraktyke.
GEVOLGTREKKING
Suid-Afrika het unieke probleme wat die hoof gebied moet word. Daar word soveel tyd en aandag bestee om ’n noodsaaklike, boervriendelike beleidsomgewing vir voedselproduksie te handhaaf dat hy die gevaar loop om geleenthede wat die vierde industriële revolusie bied, mis te loop en tegnologies agter te raak.
Maak seker dat jy jou vastrapplek in die waardekettings kry wat beter toegang tot tegnologie het om produkte kostedoeltreffend te lewer.
BRON: WEF (https://goo.gl/Nb2rBq)