‘LELIKE’ KOS WEER MOOI MET 3D-DRUKTEGNOLOGIE
jy “onaantreklike” kosprodukte wanneer jy inkopies doen? Kies jy eerder die “netjiesste” vrugte en groente en laat die knobbelrige outjies met spikkels agter?
Jy’s allermins die enigste een. Dit blyk dat verreweg die meeste verbruikers ’n verwantskap tussen die voorkoms van ’n produk en die gehalte daarvan maak . . . mooi is gesond, lelik is minder so. Dis nie net onwaar nie, maar lei ook tot ernstige vlakke van voedselvermorsing omdat die onaantreklike produkte óf glad nie die rak haal nie, óf daar bly tot dit onbruikbaar is.
Die besef van die omvang van voedselvermorsing is genoeg om sommige verbruikers te inspireer om hul koopgedrag aan te pas. Die meeste kopers weet egter óf nie hoe groot die probleem werklik is nie óf die wete is nie genoeg om ’n aanpassing te maak nie.
Volgens Studio H, ’n maatskappy wat Suid-Afrika se eerste voedsel-3D-drukker vervaardig, lyk die vermorsingsyfers in die land droewig. Sowat 30% van eetbare groente en vrugte haal nie die rakke nie weens hul voorkoms. Sowat 44% van alle kos wat vermors word, is groente en vrugte, 26% is graan en 15% is vleis.
In die plaaslike voedselketting vind 26% van voedselvermorsing tydens landbouproduksie plaas, 26% tydens hantering en opberging ná die oes, 27% tydens verwerking, 17% tydens verspreiding en in die kleinhandel, en 4% op verbruikersvlak.
Studio H demonstreer sy 3D-drukker deur ’n puree te maak van vars produkte wat deur winkels en verbruikers verwerp is en dan in aantrekliker vorms te druk.
“3D-druk kan die perfekte manier wees om kosvermorsing te verminder. Ons het die Salad 2.0 ontwerp om met dié medium te eksperimenteer. Ons het ’n klomp groente en vrugte met ongewone vorms wat gewoonlik vermors sou word, afgekook tot purees en gelatien bygevoeg sodat ons dié konsentraat in kleurryke driedimensionele jellievorms met ’n hoë voedingswaarde kon uitdruk. Verbeel jou jy sit dit vir kinders vol fiemies voor,” sê me. Hannerie Visser, stigter van Studio H.
3D-druk alleen sal nie sommer die wêreld se voedselvermorsingsprobleem oplos nie, maar dit kan wel ’n verskil maak, meen sy. 3D-druktegnologie is laat verlede jaar deur
Forbes.com uitgewys as een van nege megaVermy neigings wat die wêreld sal verander. Anders as in tradisionele vervaardiging, waartydens voorwerpe uit materiaal soos metaal gesny word, bou 3D-drukkers voorwerpe deur lae materiaal op te bou. Dit laat toe vir baie meer komplekse, maatpas voorwerpe en minder vermorsing van materiaal. Tans word plastiek, metaal, vloeistowwe, poeiers, sjokolade, beton en selfs menslike weefsel in 3D-drukkers aangewend.
NAVRAE: Webwerf: www.studio-h.co.za; e-pos: h@studio-h.co.za
BRONNE: https://goo.gl/wZWKVR; https:// goo.gl/pgtgfC