IMPLIKASIES VIR DIE SAAIBOER
Dr. Dirk Strydom, die bestuurder vir graanekonomie en -bemarking van Graan SA in Pretoria, het die syfers oor die afgelope graanoeste ontleed. Druk op winsgewendheid. Die pryse van die gewasse is om en by waar dit tien jaar gelede was. Dit is ’n wêreldwye neiging weens hoë produksiesyfers. Dit plaas uiters hoë druk op winsgewendheid weens die kosteknyptang, wat steeds bly styg. ’n Gemiddelde oes is dus nie meer genoeg om die boer se koste te dek nie. Nuwe seisoen onder druk. Die groot oes van die vorige seisoen het ’n groot oorlaatvoorraad in die stelsel geplaas, met 3,6 miljoen ton mielies. Uitvoer was ook stadig weens verskeie redes. Die verwagting is tans dat daar weer ’n oorlaatvoorraad van 3,3 miljoen ton mielies gaan wees, wat klaar weer druk op die nuwe seisoen gaan plaas, en waarskynlik teen uitvoerpariteit kan verhandel. Rekeninge moet betaal word. Terselfdertyd is dit ook baie moeilik vir produsente om minder hektare mielies te plant omdat die vaste kostestrukture redelik hoog is en die rekeninge steeds betaal moet word. Is soja ’n winsgewende alternatief? Dit was altyd ’n opsie om na sojaboonproduksie te beweeg, maar hier word ook ’n oorlaatvoorraad van 677 000 ton verwag. Dit is weens plaaslike veevoervervaardigers se gebruik van ingevoerde oliekoek, wat ’n regstreekse impak op plaaslike vraag het. Dit, tesame met die handelsoorlog tussen China en Amerika, het veroorsaak dat pryse gedaal het, wat nou weer druk op winsgewendheid plaas.