LIGBUIS VERJAAG KIEME IN WATER
Ozonetek het ’n puik oplossing om water in tenks baie veiliger te maak vir gebruik. Die produk is ’n ligbuis van 1 m lank wat in ’n wateropgaartenk pas en kieme in die water en lug in die tenk doodmaak.
Die UV-C-lamp se bestraling reik wyd genoeg om ’n watertenk met tot 5 000 liter doeltreffend te behandel. Geen chemikalieë word gebruik nie.
Toetse met die produk en volledige waterontledings wys dit verminder die heterotrofiese plaattelling met 99,9%, fekale koliforme met 100% en Escherichia coli met 100%. Deur slegs die spesiale ligbuis te gebruik kan die totale koliformetelling in die water dus met tot 99,8% verminder. Patogene organismes, bakterieë, virusse, swamme en alge oorleef ook nie dié bestraling nie.
Water uit ’n tenk waarin die Ozonetek UV-C-lamp is, is ook vry van insekte, soos muskiete. Aangesien dit bakterieë vernietig, ruik die water ook nooit sleg nie.
Die doeltreffendheid van die lig word wél beïnvloed deur die vlak van troebelheid van die water omdat ligstrale die water moet kan binnedring. Dit is daarom die geskikste vir relatief skoon water, soos boorgatwater, reënwater wat opgevang is, of vir die grootmaat-opberging van water.
Die lamp hoef nie aan die water te raak om dit te steriliseer nie en sal ook nie uitbrand as die tenk byvoorbeeld half vol is en ’n deel van die lamp bo die water uitsteek nie.
Die lamp is ontwerp om heeltyd te skyn en nie om aan en af te gaan nie. Sy leeftyd is 12 000 uur, oftewel een en ’n halwe jaar. Onderdele is geredelik beskikbaar by Ozonetek. Die ligstelsel is maklik om te installeer, verg min onderhoud en is ’n laekoste-manier om water kiemvry te maak. Prys: R3 700 (net vir die lamp).