Maak só wins met dekgewasse
Boere wat belang stel in bewaringslandbou kan aanstaande maand meer leer oor dekgewasse en hoe dit hul boerderye kan verbeter.
Die geenbewerkingsklub se konferensie oor bewaringslandbou, wat van 4 tot 6 September by die ATKV Drakensville-oord op Bergville in KwaZuluNatal aangebied word, sluit ’n werksessie oor dekgewasse in.
Dié slypskool gaan klem lê op oplossings en hoe boere met gewasdiversiteit ’n vernuwende en winsgewende strategie vir dekgewasse kan gebruik. Benewens daaglikse lesings en dié werksessie sal praktiese voorbeelde op die plaas ook bekyk kan word.
Sprekers van oor Suid-Afrika heen wat bewaringslandbou toepas, sal hul kennis en ervaring op die konferensie oordra.
Bedryfskenners en konsultante sal ook raad gee. Kenners, soos mnr. Simon Hodgson van AGT Dekgewasse, gaan op die eerste dag praat oor die gebruik van dekgewasse en plante om die biologiese bekamping van insekte en siektes te bevorder.
Die benutting van dekgewasse vir méér as net ’n deklaag en biomassa is ’n belangrike onder- werp. Mnr. Steve Groff, ’n boer van Amerika en ’n kenner op die gebied van dekgewasbestuur, sal elke dag van sy kennis oordra.
Op 4 September gaan hy wenke gee oor die verbouing van dekgewasse in ’n droëlandstelsel. Op 5 September gaan hy verduidelik hoe om dekgewasse na die volgende vlak te neem in ’n wisselboustelsel waarin minimumbewerking gebruik word. Op die derde dag van die konferensie gaan hy verduidelik hoe ’n veekomponent die gebruik van dekgewasse kan optimaliseer.
Die werksessies op 4 en 5 September sal onder meer toegespits wees op grondvrugbaarheid, onkruid, werktuie en verskillende dekgewasse. Boere wat reeds bewaringslandbou toepas, sal ook ander boere se vrae beantwoord.
Mnr. Cobus van Coller, ’n bewaringsboer van Viljoenskroon in die Vrystaat, sal op 6 September praat oor hoe hy finansiële voordeel geniet deur vee en dekgewasse te kombineer.
Mnr. Tony da Costa, ’n bewaringsboer van Nigel in Gauteng, gaan vertel hoe sy onderneming bewaringslandbou en diereproduksie integreer.
Die konferensie sluit ’n besoek aan die bewaringsboer mnr. Egon Zünckel se plaas in, asook gesellighede, etes en aantekeninge in ’n bundel.