AKADEMIE LEWER JONG BOERE-GRADUANDI
GRAAN SA se graanakademie het saam met Syngenta en die sakeskool van die Universiteit van die Vrystaat sy sewende groep gegradueerdes opgelewer.
Mnr. Jannie de Villiers, uitvoerende hoof van GSA, sê dié leierskapsopleiding was op die ouderdomsgroep 25 tot 35 jaar gemik.
“Ons probeer in dié opkomende leiers se loopbane eienskappe inbou wat hulle dadelik kan gebruik wanneer hulle by die georganiseerde landbou betrokke raak,” sê hy. “Ons probeer ook met die opleiding ’n netwerk vir die kursusgangers vestig, aangesien ’n verskeidenheid mense en boerderye daarin verteenwoordig is. Deelname was vanjaar die eerste keer vir alle bedrywe oopgestel, nie net die graanbedryf nie.”
De Villiers het sy tevredenheid met die sukses van die opleiding uitgespreek, veral ten opsigte van houdingsveranderinge wat die kandidate met die terugkeer na hul boerderye ondergaan het.
“Die geslag jonger mense kan die heersende politieke woelinge ook beter verwerk, aangesien hulle minder bagasie met hulle saamdra as hul ouers. Dit klink vir my asof die gesprekke tussen hulle meer openlik en meer robuus in ’n sekere sin is,” sê De Villiers. “Dit leer ons ook om die heersende emosies van ons tyd te hanteer in wat beskryf kan word as ’n private ‘gimnasium’, teenoor op ’n openbare verhoog.”